14 август, пайшанба куни Донецк артиллериядан шиддатли равишда ўққа тутилди. Шаҳар кенгаши маълумотларига кўра, тинч аҳолининг камида икки вакили ҳалок бўлган, дея хабар берди Euronews.
Вилоят соғлиқни сақлаш департаменти ахбороти бўйича, сўнгги уч сутка ичида жанговар ҳаракатлар натижасида камида 74 киши ҳалок бўлган.
Пайшанбага ўтар кечаси Будённовск тумани ва Моспино аҳоли пункти артиллериядан ўққа тутилган.
Бу вақтда эса «Луганск халқ республикаси» раҳбари Валерий Болотов вақтинчалик истеъфога чиқишга қарор қилди. Бунга унинг айтишича, олган жароҳати сабаб бўлган. Болотов унинг лавозимини айирмачилар ҳукумати мудофаа вазири Игорь Плотницкий эгаллаши мумкинлигини айтди. Ўтган ҳафта «Донецк халқ республикаси» бош вазири Александр Бородай ҳам ўз лавозимини тарк этган эди.
Эслатиб ўтамиз, БМТ шу ҳафта бошида Украина жануби-шарқидаги низолар қурбонлари сони 2086 кишига етганини хабар берди. Апрель ўртасидан буён Донецк ва Луганск вилоятларида ҳар ойда ўртача 60 киши ҳалок бўлмоқда. Тўрт ой ичида 5 мингдан ортиқ киши яраланган.
Изоҳ (0)