Bugun, 11-avgust ertalabdan 1979-yilgi aviahalokatda hayotdan ko‘z yumgan jamoa a’zolarini xotirlash tadbirlari o‘tkazildi. Bu haqda Stadion.uz xabar bermoqda.
“Paxtakor” stadionidagi yodgorlik oldida ko‘plab jamoa a’zolarining oilasi va yaqinlari, murabbiy va mutaxassislar, muxlislar, klublar, O‘FF va PFL vakillari, “Paxtakor”ning ayni paytdagi futbolchilari jam bo‘ldi.
Dastlab yig‘ilganlar yodgorlik oldiga gullar qo‘ydi. Mirzahakim To‘xtamirzayev, To‘lagan Isoqov, Yevgeniy Valitskiy va Grigoriy Seytlin jamoa haqida o‘z fikrlari va xotiralarini aytib, bugungi kunda marhum futbolchilar va jamoa a’zolari xotirasi uchun amalga oshirilayotgan ishlarni qayd etdi.
Shundan so‘ng, yig‘ilganlar Botkin qabristoniga yo‘l oldi. U yerda O‘FF faxriylar kengashi raisi Narimon Jalolov jamoa to‘g‘risida o‘z xotiralari bilan o‘rtoqlashdi. Botkin qabristoniga “Bunyodkor”ning asosiy tarkibi ham tashrif buyurdi.
Bugun kun davomida “Paxtakor — 79” xotirasiga bag‘ishlangan tadbir va futbol uchrashuvlari bo‘lib o‘tadi.
Eslatib o‘tamiz, 1979-yil 11-avgust kuni Toshkent vaqti bilan soat 13:35 dan 38 soniya o‘tganda Toshkent — Gurev — Donetsk — Minsk reysida parvoz qilayotgan TU — 134 samolyoti Chelyabinsk — Kishinyov reysini bajarayotgan shu rusumdagi boshqa samolyot bilan to‘qnashib ketgan. Fojea yerdan 8400 metr balandlikda yuz bergan va ikki samolyot bortida bo‘lgan 178 kishi halok bo‘lgan.
Ular orasida o‘sha vaqtda o‘zbek futbolining faxri hisoblangan “Paxtakor”ning 17 nafardan iborat quyidagi tarkibi ham bo‘lgan:
- Idgay Borisovich Tazetdinov — murabbiy
- Vladimir Vasilevich Chumakov — shifokor
- Mansur Inomjonovich Tolibjonov — ma’mur
- Mixail Ivanovich An — yarim himoyachi
- Vladimir Ivanovich Fyodorov — hujumchi
- Olim Masoliyevich Ashirov — himoyachi
- Ravil Rustamovich Agishev — himoyachi
- Konstantin Aleksandrovich Bakanov — yarim himoyachi
- Yuriy Timofeyevich Zagumennix — himoyachi
- Aleksandr Ivanovich Korchyonov — yarim himoyachi
- Nikolay Borisovich Kulikov — himoyachi
- Vladimir Vasilevich Makarov — yarim himoyachi
- Sergey Konstantinovich Pokatilov — darvozabon
- Viktor Nikolayevich Churkin — hujumchi
- Sirojiddin Ahmadovich Bozorov — hujumchi
- Shuhrat Mo‘sinovich Eshbo‘tayev — hujumchi
- Vladimir Valiyevich Sobirov — hujumchi
Izoh (0)