AQSh sudi McDonald’s’ga o‘smirlar o‘limi uchun 27 million dollar tovon to‘lash majburiyatini yukladi

AQShda sud qarori bilan McDonald’s kompaniyasi vafot etgan ikki o‘smirning oilasiga 27 million dollar tovon to‘lashi kerak bo‘ladi. Bu haqda “RIA Novosti” xabar berdi.

Amerika korporatsiyasi Texas shtatidagi Xyuston shahri yaqinida joylashgan tamaddixonalaridan birida xavfsizlikni past darajada ta’minlaganlikda ayblanmoqda. Sud fikriga ko‘ra, aynan mana shu narsa o‘spirinlarning o‘limiga sabab bo‘lgan.

2012-yilning fevralida 18 yoshli talaba yigit — Denton Jeyms Uord McDonald’s yaqinida olomon tomonidan do‘pposlab o‘ldirilgan. Uni shifoxonaga yetkazmoqchi bo‘lgan qiz — 19 yoshli Loren Beyli Krisp esa yo‘lda halokatga uchragan.

Sud McDonald’s’ga Uordlar oilasiga 16 million dollar, Krisplar oilasiga esa 11 million dollar to‘lash majburiyatini yukladi.

McDonald’s vakillari sud qaroridan norozi ekanliklarini, shikoyat arizasi berishlarini aytdi.