Amerikalik talaba Jessi Greynjer universitetdagi o‘qishiga pul to‘lash maqsadida AQSh prezidenti Barak Obamadan kelgan maktubni sotuvga qo‘ydi. Bu haqda New York Post xabar berdi.
2011-yilda Greynjer Obamaga xat yozib, o‘zining kambag‘al oilada asrandi bola sifatida voyaga yetgani, biroq shunga qaramay o‘qishga ehtiyoji balandligi haqida so‘zlab bergan. “Universitetga qabul qilindim, ammo 10 ming dollarlik to‘lovni qayerdan topishni bilmayapman”, — deb yozgan edi u. Greynjer AQSh prezidentidan o‘z orzusini ro‘yobga chiqarish uchun yordam berishini so‘ragan. Obama esa to‘g‘ridan-to‘g‘ri javob berishdan qochib, yigitchaga murojaati uchun minnatdorlik bildirgan.
“Ruhlantiruvchi hikoyang uchun rahmat. Bugungi kunda senga beradigan eng yaxshi maslahatim — bu ta’limni oxiriga yetkazish. Men sen bilan faxrlanaman. Doimo mana shunday g‘ayratli bo‘lib qol!” — deya javob yozgan Obama.
Endi, javob xati olganidan uch yil o‘tib, talaba maktubni 9,5 ming dollarga sotmoqchi.
Izoh (0)