So‘nggi o‘n yillikda OIV (Odam immunitet tanqisligi virusi), sil va bezgak kasalliklari natijasida o‘lim soni dunyo bo‘yicha keskin kamaydi. Bu haqda The Lancet tibbiy jurnalida xabar berildi.
Epidemiya avj olgan yillarga qaraganda OIV bilan xastalanish yangi holatlari uch marta kamaydi. 2000—2013-yillarda sil kasalligidan vafot etish hollari 3,7 foizga qisqardi, Afrikada esa bolalarning bezgakdan o‘lish hollari 31,5 foizga kamaydi.
Xalqaro tadqiqotchilar guruhining fikricha, OIV epidemiyasining sekinlashuviga infeksiyaning onadan bolaga o‘tish profilaktikasi va antiretrovirus terapiyasi sabab bo‘lgan. “Yildan-yilga ko‘plab odamlar OIVdan vafot etmay, u bilan yashab qolmoqda”, — deyiladi xabarda.
Global epidemiyaning avjiga chiqqan davri 1997-yilga to‘g‘ri keldi (2,8 million yangi OIV yuqtirganlar qayd etilgan). 2013-yilga kelib, ushbu ko‘rsatkich 1,8 milliontagacha qisqardi.
Yigirmanchi asrning so‘nggi o‘n yilligida sil kasalligining tarqalish koeffitsiyenti har yili 0,4 foizga oshib borgan bo‘lsa, 2000—2013-yillarda 1,3 foiz tezlikda tushib keta boshladi.
1990-yildan kuchaya boshlagan bezgak 2003—2004-yillarda avjiga chiqqan. O‘shanda 232 million kishi xastalangan, 1,2 million kishi vafot etgan. 2013-yilga kelib ushbu ko‘rsatkich (vafot etayotganlar) 855 ming kishiga tushib ketdi.
Izoh (0)