ОИВ ва сил касаллиги глобал эпидемияси сустлашгани хабар берилди

Сўнгги ўн йилликда ОИВ (Одам иммун танқислиги вируси), сил ва безгак касалликлари натижасида ўлим сони дунё бўйича кескин камайди. Бу ҳақда The Lancet тиббий журналида хабар берилди.

Эпидемия авж олган йилларга қараганда ОИВ билан хасталаниш янги ҳолатлари уч марта камайди. 2000—2013 йилларда сил касаллигидан вафот этиш ҳоллари 3,7 фоизга қисқарди, Африкада эса болаларнинг безгакдан ўлиш ҳоллари 31,5 фоизга камайди.

Халқаро тадқиқотчилар гуруҳининг фикрича, ОИВ эпидемиясининг секинлашувига инфекциянинг онадан болага ўтиш профилактикаси ва антиретровирус терапияси сабаб бўлган. «Йилдан йилга кўплаб одамлар ОИВдан вафот этмай, у билан яшаб қолмоқда», — дейилади хабарда.

Глобал эпидемиянинг авжига чиққан даври 1997 йилга тўғри келди (2,8 миллион янги ОИВ юқтирганлар қайд этилган). 2013 йилга келиб, ушбу кўрсаткич 1,8 миллионтагача қисқарди.

Йигирманчи асрнинг сўнгги ўн йиллигида сил касаллигининг тарқалиш коэффициенти ҳар йили 0,4 фоизга ошиб борган бўлса, 2000—2013 йилларда 1,3 фоиз тезликда тушиб кета бошлади.

1990 йилдан кучая бошлаган безгак 2003—2004 йилларда авжига чиққан. Ўшанда 232 миллион киши хасталанган, 1,2 миллион киши вафот этган. 2013 йилга келиб ушбу кўрсаткич (вафот этаётганлар) 855 минг кишига тушиб кетди.