Amerika Federal qidiruv byurosi (FQB) ko‘pincha AQShda yashovchi musulmonlarga qarshi soxta operatsiyalar o‘tkazib, ularni teraktlar sodir qilishga gijgijlagan. Bunday xulosa Human Rights Watch xalqaro huquqni muhofaza qilish tashkiloti ma’ruzasida keltirilgan, deb yozadi “ITAR-TASS”.
Huquq muhofazachilari islomga e’tiqod qiluvchilar terrorchilik harakatini uyushtirishga uringani bo‘yicha 27 ta sud jarayonini o‘rganib chiqdi. Ma’lum bo‘lishicha, ularning deyarli yarmiga nisbatan FQB xodimlari soxta operatsiyalarni o‘tkazgan.
Tashkilotning Vashingtondagi byurosi direktori o‘rinbosari Andrea Presouning aytishicha, Amerika hukumati AQSh hududida terrorizmga qarshi faol kurash olib borayotganini ta’kidlaydi. “Ushbu holatlar diqqat bilan o‘rganib chiqilsa, huquq himoyachilari bosim o‘tkazmagan taqdirda, odamlar o‘zlari aybdor deb topilgan jinoyatni sodir qilmagan bo‘lishini tushunish mumkin, — dedi Presou. — Ba’zi holatlarda, hattoki hukumat kishilarni teraktlar uyushtirishga undashi uchun o‘z qo‘li ostidagilarga pul to‘lagan”.
2012-yilda Pentagon va Kongress binolarida terakt sodir qilishga urinishda ayblanib, 17 yilga qamalgan bangladeshlik Rizvon Firdavs ishi bunday soxta teraktga misol qilib keltirildi. FQB Firdavsning ruhiy kasal ekanini juda yaxshi bilgan. Shunga qaramay, idora yigitning yoniga o‘z informatorini yuborib, terrorchilik harakatini rejalashtirishni o‘rgatgan.
Izoh (0)