Ўзбекистонда атом электр станцияси қурилиши ҳақидаги хабар тасдиқланмади

Ўзбекистонда узоқ муддатли даврда атом электр станцияси қурилиши режалаштирилмаяпти. Бу ҳақда «Ўзбекэнерго»га таяниб, «Новый век» нашри хабар берди.

Аввалроқ хориж ОАВлари орқали яқин йилларда Ўзбекистон ҳукуматининг республика шимоли-шарқий қисмида атом электр станциясини қуришни режалаштираётгани ҳақида хабарлар тарқалган эди, деб ёзади Anhor.uz.

«Ўзбекэнерго» хабарида айтилишича, ушбу маълумот ҳақиқатга тўғри келмайди. Компаниянинг истиқболдаги режаларида атом электр станциясини қуриш кўзда тутилмаган.

Anhor.uz қайд этишича, АЭС қурилиши Ўзбекистон 1993 йилдан буён риоя қилиб келаётган ядродан холи ҳудуд концепциясига зиддир.

Жорий йилнинг апрель ойида Хитой, Франция, Россия, Буюк Британия ва АҚШдан иборат бешта ядро мамлакатлари қарор имзолади. Унга кўра, ушбу давлатлар Марказий Осиё мамлакатларига қарши ядро қуроли ишлатмаслик, таҳдид қилмаслик ёки ушбу ҳудудда ядро қуроли билан боғлиқ ишлаб чиқишни амалга оширмаслик мажбуриятини олди.

Келишув Ўзбекистон, Қозоғистон, Қирғизистон, Тожикистон ва Туркманистондан иборат Марказий Осиёни «Ядро қуролидан холи ҳудуд» сифатида тан олади.