O‘zbekiston oliy ta’lim muassasalariga 2014-yil 543 mingdan ziyod abituriyent ariza topshirdi. Bu mustaqillik yillaridagi mutlaq rekord ko‘rsatkich hisoblanadi, deb ma’lum qildi “Kun” Gazeta.uz xabariga asoslanib.
Vazirlar Mahkamasi huzuridagi Davlat test markazi ma’lumotlariga ko‘ra, har bir talabalik o‘rni uchun o‘rtacha to‘qqiz nafar abituriyent da’vogarlik qilmoqda.
Eng katta tanlov Toshkent tibbiyot akademiyasining Farg‘ona filialida kuzatilgan bo‘lib, har bir o‘rin uchun 20,8 kishi da’vogar ekani qayd etildi (jami 135 o‘ringa 2,8 ming da’vogar).
Shuningdek, Qarshi (1245 o‘ringa 20,65 ming ariza, har bir o‘ringa 16,59 da’vogar) va Termiz davlat universitetlarida (1690 o‘ringa 27,55 ming ariza, har bir o‘ringa 16,3 da’vogar) ham yuqori tanlov kuzatilgan.
Eng ko‘p ariza, 2013-yildagi kabi Termiz davlat universitetiga berilgan. Ikkinchi va uchinchi o‘rinni Jizzax davlat pedagogika instituti (22 ming) va Andijon davlat universiteti (20,8 ming) egallagan.
Eslatib o‘tamiz, 2013-yili o‘qishga kirish uchun 480 mingdan ortiq abituriyent ariza topshirgan, har bir o‘rin uchun esa o‘rtacha 8,5 kishi da’vogarlik qilgandi.
Avval xabar berganimizdek, 2014—2015-o‘quv yili uchun 58 mingga yaqin talaba qabul qilinadi. O‘zbekiston oliy ta’lim muassasalariga kirish test imtihonlari 1-avgust kuni bo‘lib o‘tadi.
Izoh (0)