Eronning boyitilgan uran zaxiralari yo‘q qilingani haqida xabar berildi

Atom energiyasi bo‘yicha xalqaro agentlik (MAGATE)ning ta ’kidlashicha, Eron o‘tgan yili noyabr oyida Jeneva shahrida dunyoning olti kuchli mamlakatlari vakillari bilan kelishganidek, uranning yuqori darajada boyitilgan zaxiralarini yo‘q qildi. Bu haqda Segodnya.ua ma’lum qildi.

MAGATE ma’ruzasida Eronning o‘tgan hafta amal qilish muddati 20-iyuldan noyabrgacha cho‘zilgan bitim shartlarini bajargani qayd etildi.

Bitim talablariga ko‘ra, Tehron uranni 20 foizgacha boyitish jarayonini to‘xtatishi va amaldagi yuqori darajada boyitilgan uranni o‘zgartirishi lozim edi.

Avvalroq Eron, Xitoy, Rossiya, Germaniya, Buyuk Britaniya, Fransiya va AQSh vakillari Venada Eron yadro dasturi bo‘yicha bir necha bor muzokaralar olib borgan. Biroq 20-iyulga qadar “oltilik” Eron bilan keng qamrovli yakuniy bitimning shartlarini belgilashda o‘zaro kelisholmagan.

G‘arb davlatlari Eronni yadro quroli yaratishi mumkinligini gumon qilmoqda. Tehron esa uning yadroviy dasturlari tinchlik maqsadlarida amalga oshirilayotganini ta’kidlamoqda.