Yaponiya kompaniyalari O‘zbekistonda mehmonxonalar qurishi mumkin

17-iyul kuni O‘zbekiston Respublikasi Tashqi iqtisodiy aloqalar, investitsiyalar va savdo vazirligida Yaponiya-O‘zbekiston Xalqaro almashinuv qo‘mitasining raisi Kenichi Matsumoto rahbarligidagi Yaponiya delegatsiyasi bilan uchrashuv bo‘lib o‘tdi.Bu haqda O‘zbekiston Respublikasi Tashqi iqtisodiy aloqalar, investitsiyalar va savdo vazirligi matbuot xizmati xabar berdi.

Muzokaralar chog‘ida savdo-iqtisodiy, investitsion va gumanitar sohalarda ikki tomonlama munosabatlarni kengaytirish istiqbollari muhokama qilindi. Asosiy e’tibor sog‘liqni saqlash sohasida hamkorlikdagi loyihalarni amalga oshirishga qaratildi.

Shuningdek, turizm sohasida ham hamkorlikni rivojlantirish bo‘yicha takliflar ko‘rildi. Yaponiya kompaniyalari O‘zbekistonning yirik sayyohlik markazlarida mehmonxona majmualari qurilishiga jalb etilishi mumkin.

Matsumoto hamkorlikning juda katta istiqboli mavjudligini, sherikchilik aloqalarini kengaytirishga intilishdan ikki tomon ham manfaatdor ekanligini, ushbu tadbir shu yilning 3-martida Tokiyo shahrida tashkillashtirilgan O‘zbek-Yapon hamkorligi Forumi natijalariga ko‘ra erishilgan kelishuv asosida o‘tkazilayotganini alohida ta’kidlab o‘tdi. O‘zbekistonga ishbilarmon doira vakillarining tashrifi Yaponiya tomonining uzoq muddatli ikki tomonlama savdo, sarmoya va madaniyat aloqalarini rivojlantirishga qiziqishi ortib borayotganidan dalolat berishini aytib o‘tdi.