17 июль куни Ўзбекистон Республикаси Ташқи иқтисодий алоқалар, инвестициялар ва савдо вазирлигида Япония-Ўзбекистон Халқаро алмашинув қўмитасининг раиси Кеничи Мацумото раҳбарлигидаги Япония делегацияси билан учрашув бўлиб ўтди.Бу ҳақда Ўзбекистон Республикаси Ташқи иқтисодий алоқалар, инвестициялар ва савдо вазирлиги матбуот хизмати хабар берди.
Музокаралар чоғида савдо-иқтисодий, инвестицион ва гуманитар соҳаларда икки томонлама муносабатларни кенгайтириш истиқболлари муҳокама қилинди. Асосий эътибор соғлиқни сақлаш соҳасида ҳамкорликдаги лойиҳаларни амалга оширишга қаратилди.
Шунингдек, туризм соҳасида ҳам ҳамкорликни ривожлантириш бўйича таклифлар кўрилди. Япония компаниялари Ўзбекистоннинг йирик сайёҳлик марказларида меҳмонхона мажмуалари қурилишига жалб этилиши мумкин.
Мацумото ҳамкорликнинг жуда катта истиқболи мавжудлигини, шерикчилик алоқаларини кенгайтиришга интилишдан икки томон ҳам манфаатдор эканлигини, ушбу тадбир шу йилнинг 3 мартида Токио шаҳрида ташкиллаштирилган Ўзбек-Япон ҳамкорлиги Форуми натижаларига кўра эришилган келишув асосида ўтказилаётганини алоҳида таъкидлаб ўтди. Ўзбекистонга ишбилармон доира вакилларининг ташрифи Япония томонининг узоқ муддатли икки томонлама савдо, сармоя ва маданият алоқаларини ривожлантиришга қизиқиши ортиб бораётганидан далолат беришини айтиб ўтди.
Изоҳ (0)