Россиялик ФИФА ҳаками Валерий Бутенко Равшан Эрматов Бразилиядаги жаҳон чемпионати финал учрашувини бошқариш учун ҳар томонлама тўғри келишини айтди, деб ёзади Sport-express.ru.
Авваламбор унинг профессионал маҳоратига тўхталиб ўтар экан Бутенко Эрматовнинг ўзи ҳам футбол билан шуғулланиб кўргани, шу туфайли бу ўйинни чуқур тушунишини таъкидлади. «Тахминан 18 ёшида жиддий жароҳат туфайли футболни тарк этгач, арбитрлик учун эрта ҳисобланган ёшда ҳакамлик қила бошлади, вақт ўтгач ҳақиқий профессионалга айланди», — деди у.
Россиялик арбитр ҳамюртимиз ишни муваффақиятли олиб бориш учун етарли даражадаги хусусиятларга эга эканлигини айтди ва бунда унинг юқори руҳий бардошлилиги, жисмоний тайёргарлиги, шунингдек арбитрлар учун айнан мос — 183 сантиметрлик бўйи ҳамда инглиз тилини яхши билишини алоҳида тилга олди.
«Спортчиларга хос дадиллиги унга бутун 90 дақиқа давомида совуққонликни сақлаб туриш ва майдондаги вазиятни кузатиш учун қулай жой излашдан чарчамаслик имконини беради», — деди Бутенко.
Эрматовдаги ижобий хислатларни санаш билан бирга, россиялик арбитр ундаги камчиликларга ҳам тўхталиб ўтди. «Жисмоний тайёргарликнинг юқори даражада бўлиши ҳакамларга баъзан ҳалақит ҳам беради, — деди у. — Одатда жамоалардан бири ҳужум бошлаганида рефери уларни олдинга ўтказиб юбориши керак. Бироқ ҳозирги кунда ҳакам улар билан тенгма-тенг ҳаракатланиб, футболчиларга халал бериб қўйиши мумкин».
Бутенко, умуман олганда, Равшан Эрматовни финални бошқариш учун энг яхши номзод деб билишини айтди. «Финалда Германия ва Аргентина ўйнаши маълум бўлганидан сўнг унинг имконияти янада кўпайди. Агар ярим финалда Голландия ютганида, сўнгги матчга европалик арбитр тайинланиши мумкин эди, — деди у. — Энди эса осиёлик, бунинг устига ўта малакали рефери бундай вазиятда энг ‘қимматбаҳо хазинаъдир».
Изоҳ (0)