22-may kuni soat 18:00 da “Samarqand darvoza” savdo majmuasida “Geolog. O‘limdan kuchli” filmining premyerasi bo‘lib o‘tdi. Popcorn.uz’ning yozishicha, majmuaning ikkinchi qavatida gala premyera tashkil etilib, yuzlab kino shinavandalari bu jarayonni bevosita shu qavatda o‘rnatilgan ekran orqali uchinchi va to‘rtinchi qavatdan turib kuzatish imkoniyatiga ega bo‘ldi. Shuningdek, savdo majmuasi kirish qismi oldiga ham katta ekran joylashtirilib, bu yerga tashrif buyurganlar premyera jarayonini bevosita onlayn tarzda ekran orqali tomosha qildi.
Premyerada Davron Qobulov va Nilufar Sotiboldiyeva boshlovchilik qildi. Ular ketma-ket san’atkorlarni qizil gilam uzra chorlab, barchasi bilan qisqagina suhbat uyushtirdi.
Kechaning eng asosiy mehmoni, ya’ni kartina voqealarining bosh qahramoni — Abdujamil Sodiqov bo‘ldi. Ayni vaqtda 70 yoshni qarshilagan Abdujalil Yo‘ldoshevning kechinmalari “Geolog. O‘limdan kuchli” kartinasi yaratilishining asosi bo‘lib xizmat qildi.
Kechaning mashhur mehmonlari qarshi olingach, sahnaga o‘zbek estradasining mashhur yulduzlaridan Nilufar Usmonova va Lola o‘z qo‘shiqlari bilan barchaga yaxshi kayfiyat bag‘ishladi. Shuningdek, Shahzoda “Geolog. O‘limdan kuchli” filmi uchun asosiy rasmiy saundtrek sifatida tanlangan “Malo li” taronasini ijro etdi. Shundan so‘ng, barcha mehmonlar “Samarqand darvoza” majmuasining 4-qavatida joylashgan kinoteatrga taklif qilindi.
Popcorn.uz’ning ta’kidlashicha, “Geolog. O‘limdan kuchli” filmini o‘zbek kino sohasini yangi bosqichga eltuvchi kartina deyish mumkin. Noodatiy mavzu, noodatiy janr, noodatiy tasvirlar, biroq bularning barchasi real hayotiy voqealar asosida suratga olingan. Ana shu jihat bilan ham tomoshabin diqqatini jalb eta oladi.
Izoh (0)