22 май куни соат 18:00 да «Самарқанд дарвоза» савдо мажмуасида «Геолог. Ўлимдан кучли» фильмининг премьераси бўлиб ўтди. Popcorn.uz’нинг ёзишича, мажмуанинг иккинчи қаватида гала премьера ташкил этилиб, юзлаб кино шинавандалари бу жараённи бевосита шу қаватда ўрнатилган экран орқали учинчи ва тўртинчи қаватдан туриб кузатиш имкониятига эга бўлди. Шунингдек, савдо мажмуаси кириш қисми олдига ҳам катта экран жойлаштирилиб, бу ерга ташриф буюрганлар премьера жараёнини бевосита онлайн тарзда экран орқали томоша қилди.
Премьерада Даврон Қобулов ва Нилуфар Сотиболдиева бошловчилик қилди. Улар кетма-кет санъаткорларни қизил гилам узра чорлаб, барчаси билан қисқагина суҳбат уюштирди.
Кечанинг энг асосий меҳмони, яъни картина воқеаларининг бош қаҳрамони — Абдужамил Содиқов бўлди. Айни вақтда 70 ёшни қаршилаган Абдужалил Йўлдошевнинг кечинмалари «Геолог. Ўлимдан кучли» картинаси яратилишининг асоси бўлиб хизмат қилди.
Кечанинг машҳур меҳмонлари қарши олингач, саҳнага ўзбек эстрадасининг машҳур юлдузларидан Нилуфар Усмонова ва Лола ўз қўшиқлари билан барчага яхши кайфият бағишлади. Шунингдек, Шаҳзода «Геолог. Ўлимдан кучли» фильми учун асосий расмий саундтрек сифатида танланган «Мало ли» таронасини ижро этди. Шундан сўнг, барча меҳмонлар «Самарқанд дарвоза» мажмуасининг 4-қаватида жойлашган кинотеатрга таклиф қилинди.
Popcorn.uz’нинг таъкидлашича, «Геолог. Ўлимдан кучли» фильмини ўзбек кино соҳасини янги босқичга элтувчи картина дейиш мумкин. Ноодатий мавзу, ноодатий жанр, ноодатий тасвирлар, бироқ буларнинг барчаси реал ҳаётий воқеалар асосида суратга олинган. Ана шу жиҳат билан ҳам томошабин диққатини жалб эта олади.
Изоҳ (0)