Koreya OAVlari xabariga ko‘ra, Samsung o‘z flagman smartfonlari sotuvi bo‘yicha rekord o‘rnatdi: kompaniya atigi 25 kun ichida 10 million dona Galaxy S5 sotishga muvaffaq bo‘ldi. Bu haqda mail.ru xabar berdi.
Undan avvalgi flagman — Samsung Galaxy S4 10 millionlik marraga 27 kunda yetgan edi. Bunday natijaga erishish uchun Galaxy S3’ga 50 kun, Galaxy S2’ga taxminan 5 oy, birinchi Galaxy S’ga esa 7 oy kerak bo‘lgan.
Eslatib o‘tamiz, Galaxy S5 5,1 dyuymli Super AMOLED displeyi (1920×1080), Qualcomm Snapdragon 801 to‘rt yadroli protsessor, 2 Gb tezkor va 16/32 Gb ichki xotira bilan ta’minlangan. Kamerasi 16 megapiksellidir. Soatiga 2800 milliamperli akkumulyator smartfonni suhbat rejimida 21 soatgacha quvvat bilan ta’minlab turadi.
Yangi Samsung Galaxy S5 mukammalashgan kamera, ma’lumotlarni yuqori tezlikda yetkazish imkoniyati, keng qamrovli fitnes-dasturlar tanlovi va ishonchli himoyaga ega. Uning avvalgi Galaxy’lardan farqi 16 megapikselli kamera, S Health 3.0 xizmati (qadamo‘lchagich, parhez, jismoniy mashqlarni qayd etish va eng yangisi — puls datchigi), IP67 standartlari bo‘yicha himoya vositasi (chang, namlik, qum va hatto, suvdan ham himoyalangan), barmoq izlari biometrik skaneri va zamonaviy tashqi ko‘rinishga ega ekanligidadir.
Izoh (0)