iPhone, iPad va Mac foydalanuvchilari fayllarini AQSh hukumatiga taqdim etishi mumkinligini Apple tan oldi

Amerikaning Apple kompaniyasi so‘rov bo‘yicha AQSh hukumatiga o‘z mijozlarining nafaqat identifikatsion ma’lumotlarini, balki, shaxsiy fotosuratlari, kontaktlar ro‘yxati, yozishmalari, hujjatlari va boshqa ma’lumotlarni taqdim etish imkoniyatiga ega. Bu haqda Apple’ning AQSh huquqni muhofaza qilish organlari va hukumati bilan ishlash bo‘yicha yangi siyosatida aytiladi, deya xabar berdi “ITAR-TASS”.

Hujjatda aytilishicha, Apple o‘z mahsuloti egasining jismoniy va elektron manzili, telefon raqami, qurilmasi, xarid sanasi ma’lumotlarini saqlaydi va AQSh hukumati so‘rovi bilan ularga taqdim etadi.

Agarda, xaridor iTunes media-pleyeri va Apple Store do‘konidan foydalansa, xaridlar, yuklashlar, kredit karta raqami ham Apple tomonidan berilishi mumkin. iCloud servisi foydalanuvchilariga tegishli surat, hujjat, kontakt, taqvimlar ham xuddi shu tarzda AQSh hukumati qo‘liga kelib tushishi mumkin.

Apple davlat tomonidan so‘ralgan axborotlar haqida sud tomonidan taqiqlanmagan bo‘lsa, o‘z foydalanuvchilarini ogohlantiradi.