Hindistonda poyezd izdan chiqishi natijasida 19 kishi halok bo‘ldi

Hindiston g‘arbidagi Maxarashtra shtatida lokomotiv va to‘rtta yo‘lovchi vagoni izdan chiqib ketdi. Natijada 19 kishi halok bo‘ldi, yana 30 kishi turli darajadagi tan jarohatlari oldi. Bu haqda NDTV telekanali xabar berdi.

Mahalliy politsiya ma’lumotlariga ko‘ra, halokat yakshanba kuni Toshkent vaqti bilan 9:30 da sodir bo‘lgan. Raygad okrugida Mumbaydan 110 kilometr janubdagi tunneldan chiqqan poyezd to‘satdan izdan chiqib ketgan. Dastlabki ma’lumotlar bo‘yicha bunga vagonlarning yomon texnik ahvoli va boshqaruvdagi xatolik sabab bo‘lgan.

Hindiston qatnov yo‘llari vazirligi qurbonlar oilalariga tovon puli sifatida 200 ming rupiya (taxminan 3300 dollar)dan to‘lashga va’da berdi.