Ҳиндистонда поезд издан чиқиши натижасида 19 киши ҳалок бўлди

Ҳиндистон ғарбидаги Махараштра штатида локомотив ва тўртта йўловчи вагони издан чиқиб кетди. Натижада 19 киши ҳалок бўлди, яна 30 киши турли даражадаги тан жароҳатлари олди. Бу ҳақда NDTV телеканали хабар берди.

Маҳаллий полиция маълумотларига кўра, ҳалокат якшанба куни Тошкент вақти билан 9:30 да содир бўлган. Райгад округида Мумбайдан 110 километр жанубдаги туннелдан чиққан поезд тўсатдан издан чиқиб кетган. Дастлабки маълумотлар бўйича бунга вагонларнинг ёмон техник аҳволи ва бошқарувдаги хатолик сабаб бўлган.

Ҳиндистон қатнов йўллари вазирлиги қурбонлар оилаларига товон пули сифатида 200 минг рупия (тахминан 3300 доллар)дан тўлашга ваъда берди.