O‘zbekistonlik yoshlarning ko‘pchiligi ikki farzandi bo‘lishini xohlaydi

“Ijtimoiy fikr”jamoatchilik fikrini o‘rganish markazi “O‘zbekiston aholisining reproduktiv yo‘nalishi”mavzusida so‘rov o‘tkazdi. So‘rov natijalari “Pravda Vostoka” gazetasining 29-aprel, seshanba sonida e’lon qilindi, deb yozadi “Kun” nashri.

So‘rov natijalariga ko‘ra, O‘zbekistondagi oilalarning 25 foizi ikki farzand, 23,6 foizi esa uch farzandni tarbiya qilmoqda. E’tiborli tomoni, ikki farzandli oilalarning aksariyati qishloq joylarda istiqomat qiladi. Qishloq oilalarining 14,5 foizida to‘rt bola bor. Respublika oilalarining 6,5 foizi besh farzandga, 4,9 foizi esa olti farzandga ega.

Ayni vaqtda, so‘rovnoma davomida berilgan: “Oilada qancha farzand bo‘lgani yaxshi?”qabilidagi savolga o‘zbekistonliklarning aksariyati “to‘rt nafar”deb javob bergan. Qishloq aholisining ko‘pchiligi – 37,6 foizi bu raqamni eng to‘g‘ri deb biladi, shu bilan birga, shaharliklarning 31,7 foiziga ikki farzand ayniqsa maqbul.

E’tiborli tomoni, so‘rovnoma ishtirok etganlar orasidagi 21 yoshdan 24 yoshgacha va 25 yoshdan 29 yoshgacha bo‘lganlarning ko‘pchiligi (mos ravishda 37,3 va 32,6 foizi) ikki farzandi bo‘lishini xohlashini ma’lum qilgan. Nisbatan katta yoshlilar – 30 yoshdan 39 yoshgacha bo‘lganlarning 33,5 foizi esa oilada to‘rt nafar farzand bo‘lishi kerak deb hisoblaydi, 40 yoshdan 49 yoshgacha bo‘lgan ayol va erkaklar orasida bu fikrga qo‘shiluvchilar soni yanada ko‘proq – 41,8 foiz.

So‘rovnomada qatnashganlarning 25,2 foizi ikki farzandli bo‘lishni, 24,7 foizi esa uch, 17,8 foizi to‘rt farzandli bo‘lishni rejalashtirmoqda. To‘rt farzandli oila tashkil etish niyatida bo‘lganlarning 21 foizini shaharliklar, 14,2 foizini esa qishloq aholisi tashkil qiladi. “Bolalar sonini belgilovchi omillar sifatida oilaning iqtisodiy ahvoli va er-xotinlarning salomatligi ko‘rsatilayotgani ham e’tiborga molik”, – deb yozadi gazeta.

O’zbekistondagi oilalarning 91,3 foizi bolalarning ma’naviy tarbiyasi haqida qayg‘uradi, ayni vaqtda, so‘rovnomada ishtirok etganlarning 41,9 foizi to‘g‘rilikni axloq-odobning asosiy belgisi deb bilsa, 37,9 foizi vatanparvarlik va Vatanga nisbatan muhabbatni, 36,1 foizi esa milliy qadriyatlarga hurmatni hisoblaydi. “O’zbekitsondagi juda ko‘pchilik oilalarda yangi avlodga mustahkam odob asoslari, yuksak ma’naviy axloq tamoyillari singdirilmoqda”, – deyiladi “PV”maqolasida.

So‘rovnoma qatnashganlarning 59,7 foizining fikricha, ma’naviy sog‘lom bolalar ham ota, ham onasi bo‘lgan oilalarda tarbiya topadi. 31,1 foiz ishtirokchilarning qayd etishicha, buva yoki buvi tomonidan boshqariladigan oila ma’naviy sog‘lom avlodning yetilishiga ko‘proq ta’sir ko‘rsatadi. “Ma’naviy-axloqiy sog‘lom, Vatanga sodiq bolalar mehnatsevar, to‘g‘ri, ma’naviy sog‘lom va ahil oilalarda tarbiya topishiga ko‘pchilik o‘zbekistonliklarning ishonchi komil”, – deb qo‘shimcha qilinadi “Pravda Vostoka”da.