O‘zbekiston Respublikasi Sog‘liqni saqlash vazirligi aholining ko‘p sonli murojaatlarga javoban Toshkent shahar sog‘liqni saqlash Bosh boshqarmasi tizimidagi davolash-profilaktika muasasalarida hamda Toshkent shahrida joylashgan respublika markazlari, klinikalari va statsionar muassasalarida ko‘rsatilayotgan asosiy diagnostik, laborator va instrumental tekshirishlar narxlariga preyskurantni o‘z saytida joylashtirdi.
Tibbiy xizmatlarga tariflar (narxlar) amaldagi normativ-huquqiy hujjatlarga asosan tibbiyot muassasalari tomonidan ushbu muassasalarning tibbiy xizmat ko‘rsatish bilan bog‘liq haqiqiy xarajatlariga asosan hisoblanadi. Muassasalarning ixtisosligi, tibbiy xizmat ko‘rsatish bilan bog‘liq haqiqiy xarajatlari va moddiy-texnik bazasidagi tafovutlarini inobatga olgan holda bir xil turdagi tibbiy xizmatlar har xil davolash-profilaktika muassasalarida o‘zaro farq qiladi.
Saytda keltirilgan narxlar tibbiyot muassasalari tomonidan tasdiqlangan va yuqori sog‘liqni saqlash boshqaruv organi, ya’ni Toshkent shahar sog‘liqni saqlash Bosh boshqarmasi yoki O‘zbekiston Respublikasi Sog‘liqni saqlash vazirligi bilan kelishilgan.
O‘zbekiston Respublikasi Sog‘liqni saqlash vazirligi tibbiy xizmatlar iste’molchilarining pullik xizmatni tashkil etish tartibi, tibbiy xizmatlarga tariflarni (narxlarni) shakllantirish, bepul tibbiy xizmat olish huquqiga ega bo‘lgan imtiyozli toifalar ro‘yxati hamda boshqa masalalar bo‘yicha barcha savollariga javob berishga tayyorligini bildiradi.
Izoh (0)