Deputatlar transport vaziriga Toshkent—Samarqand va Toshkent—Farg‘ona avtomobil yo‘llari qurilishi yuzasidan so‘rov yubordi. Bu haqda O‘zA xabar berdi.
Maʼlum qilinishicha, Qonunchilik palatasining majlisida deputatlar transport vaziri Ilhom Mahkamovga “Global transport-logistika tarmoqlariga O‘zbekiston Respublikasining integratsiyasini chuqurlashtirish va milliy transport tizimi samaradorligini kuchaytirish bo‘yicha amalga oshirilayotgan ishlar to‘g‘risida” Qonunchilik palatasining parlament so‘rovini yuborish haqidagi masalani ko‘rib chiqdi.
Xabarga ko‘ra, sohada ishlarni izchil tashkil etish va natijadorlikka erishish borasida ayrim kamchiliklar va muammolar mavjud. Jumladan, Toshkent—Samarqand va Toshkent—Farg‘ona vodiysi yo‘nalishlarida davlat-xususiy sheriklik asosida avtomobil yo‘llarini qurish ishlari paysalga solib kelinmoqda. Ushbu avtomobil yo‘llarini qurish loyihasi xorijiy kompaniyalarga topshirilgan bo‘lib, bu loyihalar bugungi kunda ham yakuniga yetkazilmasdan qolmoqda.
Bundan tashqari, samaradorligi past bo‘lgan hududiy aeroportlarni davlat-xususiy sheriklik asosida modernizatsiya qilish va ishonchli boshqaruvga berish ishlariga yetarli darajada eʼtibor qaratilmayapti. Bu borada Qatar, Saudiya Arabistoni, Birlashgan Arab Amirliklari, Yaponiya, Germaniya, Koreya va Argentina kabi davlatlarning kompaniyalari bilan muzokaralar o‘tkazilgan bo‘lsa-da, biror amaliy natijaga erishilmagan.
Shundan kelib chiqib, majlisda Toshkent—Samarqand va Toshkent—Farg‘ona vodiysi yo‘nalishlarida davlat-xususiy sheriklik asosida avtomobil yo‘llarini qurish loyihalarini yakuniga yetkazish borasida olib borilayotgan ishlar holati, samaradorligi past bo‘lgan hududiy aeroportlarni davlat-xususiy sheriklik asosida modernizatsiya qilish va ishonchli boshqaruvga berish bo‘yicha ko‘rilayotgan chora-tadbirlar to‘g‘risida asoslantirilgan tushuntirishlar berish haqida transport vaziriga parlament so‘rovi yuborildi.
Izoh (0)