Samarqand viloyati Urgut tumanidagi tog‘da yo‘ldan adashgan fuqarolarga amaliy yordam ko‘rsatildi, deb xabar beradi viloyat FVB axborot xizmati.
Qayd etilishicha, 21-aprel kuni soat 19:00 da Urgut tumani favqulodda vaziyatlar bo‘limiga ikki nafar fuqaro Urgut tumanidagi tog‘larda dam olish maqsadida chiqib, yo‘ldan adashib qolganini maʼlum qilib, pastga tushib olishda yordam so‘ragan.
Xabarga asosan, zudlik bilan qidiruv-qutqaruv ishlariga Urgut tuman yong‘in-qutqaruv qismining bir guruh qutqaruvchilari jalb qilingan. Qutqaruvchilar tomonidan olib borilgan qidiruv-qutqaruv ishlari natijasida 22-aprel kuni soat 02:45 da fuqarolar “Allayaron” tog‘ining dengiz sathidan 1800 metr balandlikdan topilgan.
Ushbu fuqarolarning xavfsizligi taʼminlangan holda tog‘dan pastga olib tushilgan. Fuqarolarning sog‘ligi yaxshi, ularga hech qanday tan jarohati yetmagan.
Eslatib o‘tamiz, 2023-yil aprelda qutqaruvchilar Toshkent viloyatining Bo‘stonliq tumanidagi tog‘larda adashib qolgan to‘rt kishiga yordam bergandi.
Izoh (0)