Vazirlar Mahkamasining qarori bilan Qurilish va uy-joy kommunal xo‘jaligi vazirligi hamda uning tizimidagi tashkilotlar to‘g‘risidagi nizomlar tasdiqlandi, deb xabar beradi Norma.
Qurilish va uy-joy kommunal xo‘jaligi vazirligi to‘g‘risidagi nizom vazirlik, uning boshqarmalari va tuman bo‘linmalari, shu jumladan, Toshkent shahar Qurilish bosh boshqarmasi va poytaxt Uy-joy kommunal xo‘jaligi bosh boshqarmasining vazifalari, funksiyalari, huquqlari va javobgarligini belgilaydi.
Hujjatda vazirlik faoliyatining samaradorligi va natijadorligini baholash mezonlari va ko‘rsatkichlari nazarda tutilgan. Shuningdek, uni moliyalashtirish va moddiy-texnik taʼminlash mexanizmlari belgilangan.
Vazirlikning asosiy vazifalari:
- shaharsozlik faoliyati sohasida yagona davlat siyosatini amalga oshirish, sohada davlat siyosatining asosiy yo‘nalishlari bo‘yicha takliflar tayyorlash, shuningdek, soha faoliyatini rivojlantirishning uzoq va o‘rta muddatli dasturlarni va NHHni ishlab chiqishda ishtirok etish;
- mamlakat hududini rivojlantirishni rejalashtirish bosh sxemasini, Qoraqalpog‘iston Respublikasi va viloyatlar hududlarini rivojlantirishni rejalashtirish sxemalarini, aglomeratsiyalarni rivojlantirish strategiyasi, shaharlar (shaharchalar) bosh rejalari va qishloq aholi punktlarining hududlarini shaharsozlik jihatidan rivojlantirish sxemalarini ishlab chiqish, ularga rioya etilishi yuzasidan davlat arxitektura nazoratini amalga oshirish;
- loyiha tashkilotlari faoliyatini muvofiqlashtirish va nazorat qilish, yakka tartibdagi, namunaviy, takroran qo‘llaniladigan eksperimental loyihalarni va energiya tejamkor loyiha yechimlari ishlab chiqishni tashkil etish, ular faoliyatini litsenziyalash hamda shaharsozlik hujjatlarining ekspertiza qilinishini taʼminlash;
- pudrat bozorini rivojlantirish, jumladan qurilish-pudrat tashkilotlarining ayrim faoliyatlarini litsenziyalash va ulush kiritish asosida quriladigan ko‘p xonadonli uylarni ro‘yxatga olishni muvofiqlashtirish va boshqalar.
Vazirlar Mahkamasi huzuridagi Respublika arxitektura-shaharsozlik kengashi to‘g‘risidagi nizomda uning vazifalari va funksiyalari, shuningdek uning tarkibi belgilangan.
Hujjat bilan Qoraqalpog‘iston Respublikasi Qurilish va uy-joy kommunal xo‘jaligi vazirligi, viloyatlar qurilish va uy-joy kommunal xo‘jaligi bosh boshqarmalari, Toshkent shahar qurilish bosh boshqarmasi huzuridagi hududiy arxitektura-shaharsozlik kengashi to‘g‘risidagi namunaviy nizom va uning namunaviy tarkibi tasdiqlangan.
Hujjat qonun hujjatlari maʼlumotlari milliy bazasida eʼlon qilingan va 2024-yil 18-apreldan kuchga kirdi.
Yanvar oxirlarida Shavkat Mirziyoyev raisligida uy-joy, qurilish, kommunal xo‘jaligi, transport va ekologiya sohalarida amalga oshirilgan ishlar va vazifalar yuzasidan o‘tkazilgan yig‘ilishda qurilishda loyihalashtirishni tartibga solish maqsadida Qurilish vazirligida Loyiha ofisi tuzilishi belgilangan edi.
Izoh (0)