Qutqaruvchilar Toshkent viloyatidagi tog‘larga chiqib, tusholmay qolgan fuqarolarga amaliy yordam ko‘rsatdi. Bu haqda FVV matbuot xizmati xabar berdi.
Qayd etilishicha, 4-iyul kuni soat 13:15 larda “Qamchiq” Maxsus qidiruv, yong‘in-qutqaruv boshqarmasining navbatchi dispetcherlik xizmatiga tog‘da odam qolib ketgani haqida ma’lumot kelib tushgan.
Shunga ko‘ra, qutqaruvchilar aytilgan manzilga zudlik bilan yetib borgan. Aniqlanishicha, Andijon viloyatidan kelgan 3 nafar fuqaro dam olish maqsadida Qamchiq dovonining “Ertosh” qishlog‘iga borib baland toqqa chiqqan va ulardan biri tog‘dan tusholmay qolib ketgan.
Qutqaruvchilar tomonidan olib borilgan qidiruv-qutqaruv ishlari natijasida fuqaro xavfsiz joyga olib tushilib, amaliy yordam ko‘rsatilgan. Hodisa oqibatida hech kim tan jarohati olmagan.
Undan bir kun avval, 3-iyul kuni 9 kishi dam olish uchun Toshkent viloyatining Bo‘stonliq tumaniga borgan va tog‘ qiyaliklarida sayr qilib yurgan vaqtida ulardan birining oyog‘i qayrilib, yiqilib tushishi oqibatida chap oyog‘i qattiq lat yeb, yurolmay qolgan.
Holat yuzasidan soat 13:30 larda Toshkent viloyati FVBning tezkor boshqaruv markaziga xabar kelib tushgan.
Zudlik bilan voqea joyiga yetib borgan Chimyon yong‘in-qutqaruv otryadining bir guruh qurqaruvchilari tomonidan olib borilgan qidiruv-qutqaruv ishlari natijasida dam oluvchilarning manzili aniqlanib, jabrlargan 21 yoshli fuqaro maxsus qutqaruv anjomlari yordamida xavfsiz joyga olib chiqilgan. Ayni vaqtda fuqaroning ahvoli yaxshi.
Izoh (0)