Surxondaryoda yil davomida qancha chiqindi chiqarilishi ma’lum qilindi

Surxondaryo viloyatida bir yilda jami 380-400 ming tonna chiqindi chiqarilishi ma’lum qilindi. Bu haqda viloyat Ekologiya boshqarmasi xabar berdi. 

Keltirilishicha, viloyat bo‘ylab o‘tgan yil davomida 30 ortiq ekoaksiyalar o‘tkazildi. Unda yoshlar, keng jamoatchilik vakillari ishtirok etdi. Shuningdek, aholi tomonidan ko‘p tashlanadigan manzillarda Ekologiya vazirligi tomonidan bugun viloyat bo‘yicha 25 ta kuzatuv kameralari o‘rnatilgan bo‘lib, ana shu kuzatuv kameralari orqali bugungi kunga qadar 100 dan ortiq fuqarolarga nisbatan ma’muriy bayonnomalar rasmiylashtirildi. 

Tahlillarga ko‘ra, so‘nggi yillarda maishiy va sanoat chiqindilarining ortayotgani Yer yuzidagi ekologik barqarorlikka salbiy ta’sir ko‘rsatmoqda. Ma’lumotlarga qaraganda, hozirgi kunda chiqindilarning 900 ga yaqin turi qayd etilgan. Har yili dunyoda chiqindilar hajmi 3 foizga ko‘paymoqda.

Surxondaryo viloyatida jami 12 ta chiqindi poligoni mavjud bo‘lib, 6 ta sanitar tozalash korxonalari voha ahliga xizmat qiladi. Viloyatda yil davomida jami 380-400 ming tonna chiqindi chiqariladi. Shundan 120-130 ming tonnasi 15 ta qayta ishlash korxonalari tomonidan qayta ishlanib, yarim tayyor va tayyor mahsulotga aylantiriladi. Bu esa yil davomida umumiy chiqariladigan chiqindining 30 foiziga to‘g‘ri keladi.