Qashqadaryo viloyatidagi Shahrisabz aeroporti ta’mirlash ishlari sabab vaqtinchalik yopiladi. Bu haqda Uzbekistan Airports matbuot xizmati xabar berdi.
Ma’lum qilinishicha, 13-mart Toshkent vaqti bilan soat 05:00 dan 25-mart 05:00 gacha aeroport o‘z faoliyatini vaqtincha to‘xtatadi.
Uchish-qo‘nish yo‘lagining uzoq muddat — 1983-yildan beri ishlatilishi munosabati bilan hamda havo kemalarining qo‘nishi va uchishi xavfsizligini ta’minlash maqsadida keng kapital qurilish va ta’mirlash ishlari olib boriladi, deyiladi xabarda.
Xususan, 1554 metr uzunlikdagi uchish-qo‘nish yo‘lagi yuzasini almashtirish va mustahkamlash rejalashtirilgan. Shuningdek, yurish yo‘lagining ustki qatlami ham ta’mirlanadi. Tanlov natijalariga ko‘ra, qurilish-ta’mirlash ishlarini “Farg‘ona yo‘llardan muntazam foydalanish korxonasi” olib boradi.
Qayd etilishicha, shu paytgacha Shahrisabz aeroportida samolyotlarni qabul qilish imkoniyati cheklangan edi — parvozlar haftasiga ikki marta kichik L-410 samolyotlarida amalga oshirilardi. Uchish-qo‘nish yo‘lagi ta’mirlangandan so‘ng aeroport o‘rta masofaga mo‘ljallangan zamonaviy ATR-72 samolyotlarini haftasiga uch martagacha qabul qilish imkoniyatiga ega bo‘ladi.
Shavkat Mirziyoyev 2023-yilning oktyabrida o‘tgan yig‘ilishda Shahrisabz aeroportida yangi ATR samolyoti parvozlari yo‘lga qo‘yilib, Samarqand, Buxoro, Xorazm va vodiy viloyatlariga mahalliy reyslar ko‘paytirilishini aytgandi.
Izoh (0)