Қашқадарё вилоятидаги Шаҳрисабз аэропорти таъмирлаш ишлари сабаб вақтинчалик ёпилади. Бу ҳақда Uzbekistan Airports матбуот хизмати хабар берди.
Маълум қилинишича, 13 март Тошкент вақти билан соат 05:00 дан 25 март 05:00 гача аэропорт ўз фаолиятини вақтинча тўхтатади.
Учиш-қўниш йўлагининг узоқ муддат — 1983 йилдан бери ишлатилиши муносабати билан ҳамда ҳаво кемаларининг қўниши ва учиши хавфсизлигини таъминлаш мақсадида кенг капитал қурилиш ва таъмирлаш ишлари олиб борилади, дейилади хабарда.
Хусусан, 1554 метр узунликдаги учиш-қўниш йўлаги юзасини алмаштириш ва мустаҳкамлаш режалаштирилган. Шунингдек, юриш йўлагининг устки қатлами ҳам таъмирланади. Танлов натижаларига кўра, қурилиш-таъмирлаш ишларини “Фарғона йўллардан мунтазам фойдаланиш корхонаси” олиб боради.
Қайд этилишича, шу пайтгача Шаҳрисабз аэропортида самолётларни қабул қилиш имконияти чекланган эди — парвозлар ҳафтасига икки марта кичик L-410 самолётларида амалга ошириларди. Учиш-қўниш йўлаги таъмирлангандан сўнг аэропорт ўрта масофага мўлжалланган замонавий АТR-72 самолётларини ҳафтасига уч мартагача қабул қилиш имкониятига эга бўлади.
Шавкат Мирзиёев 2023 йилнинг октябрида ўтган йиғилишда Шаҳрисабз аэропортида янги АТR самолёти парвозлари йўлга қўйилиб, Самарқанд, Бухоро, Хоразм ва водий вилоятларига маҳаллий рейслар кўпайтирилишини айтганди.
Изоҳ (0)