Davlat xavfsizlik xizmati xodimlari Sirdaryo va Namanganda soliq hamda majburiy ijro byurosi xodimlarini, Jizzaxda esa advokatni pora bilan qo‘lga oldi.
Qayd etilishicha, Sirdaryo viloyati Soliq boshqarmasining soliq to‘lovchilarga xizmat ko‘rsatish bo‘limi bosh inspektori Guliston shahrida faoliyat yurituvchi uchta MCHJning soliq qarzlarini, ushbu MCHJlarni soddalashtirilgan tartibda bankrot deb topish yo‘li bilan bartaraf qilib berish evaziga 4 ming dollar olgan vaqtida ashyoviy dalillar bilan ushlangan.
Namangan viloyati Yangiqo‘rg‘on tumani soliq inspeksiyasi katta inspektori bog‘dorchilikka ixtisoslashgan fermer xo‘jalikning 2023 va 2024-yillar uchun yer solig‘idan aniqlangan 11 million 200 ming so‘m miqdoridagi qarzdorligini bartaraf qilib berish evaziga 7 million so‘m, shuningdek, ushbu fermer xo‘jalik rahbarining tanishiga tegishli noturar joyning mol-mulk va yer soliqlaridan bo‘lgan 55 million 100 ming so‘m qarzdorligini ham to‘liq bartaraf qilib berish evaziga 28 million so‘m talab qiladi. U talab qilingan jami 35 million so‘m pul mablag‘ini olgan vaqtida ushlangan.
Namangan viloyati Uchqo‘rg‘on tumanidagi meva-sabzavot saqlash faoliyati bilan shug‘ullanuvchi masʼuliyati cheklangan jamiyatga sovutish ombori qurish va unga zarur bo‘ladigan agregatlar sotib olish uchun 2023-yilning yanvar oyida aksiyadorlik tijorat bankidan 170 ming dollari miqdorida kredit ajratilgan Ammo olingan kreditni to‘lash davrida 3 oylik qarzdorlik yuzaga kelib, uni undirish maqsadida bank tomonidan Majburiy ijro byurosining Uchqo‘rg‘on tuman bo‘limiga murojaat qilingan.
Shundan so‘ng, MCHJ tomonidan kredit qarzdorligi to‘lansa-da, byuroning ikki nafar davlat ijrochisi MCHJ rahbarini aldab, go‘yoki tuman prokuraturasi tomonidan kredit mablag‘i maqsadsiz sarflangani bo‘yicha jinoyat ishi qo‘zg‘atilganini aytib, uni javobgarlikka tortilmaslik evaziga 2 ming dollar talab qilgan. MIB Uchqo‘rg‘on tuman bo‘limining davlat ijrochilari so‘ralgan pul mablag‘ini olgan vaqtida ushlangan.
Jizzax shahridagi advokatlar hayʼati advokati Jinoyat kodeksining 165- va boshqa moddalari bilan ayblanib, “qamoqqa olish” tarzidagi ehtiyot chorasi qo‘llanilgan o‘z himoyasidagi sudlanuvchiga nisbatan, sud organlaridagi mansabdor tanishlari orqali ozodlikdan mahrum qilish bilan bog‘liq bo‘lmagan jazo tayinlatib berish evaziga 10 ming dollar olgan vaqtida qo‘lga tushgan.
Hozirda mazkur shaxslaring barchasiga nisbatan jinoyat ishlari qo‘zg‘atilib, qamoqqa olish tarzidagi ehtiyot chorasi qo‘llanilgan.
Bundan oldin Nukusda 65 ming dollar evaziga DXXga ishga kiritib qo‘yishni vaʼda qilgan shaxs ushlangani, Qashqadaryoda prokuratura tergovchisi 5 ming dollar pora bilan qo‘lga tushgani to‘g‘risida xabar berilgandi.
Izoh (0)