Qoraqalpog‘iston Respublikasi va Andijon viloyatida imtiyozli kredit mablag‘larini o‘zlashtirish holatlari fosh etildi, deb xabar beradi Bosh prokuratura huzuridagi departament.
Qayd etilishicha, departamentning Andijon shahar bo‘limi tomonidan tergovga qadar tekshiruv o‘tkazilgan. Tekshiruvda “B-o.” MCHJ taʼsischisi N.M. fuqaro F.Sh.ga tegishli noturar binoni garovga qo‘yish orqali tijorat banki filialidan mehmonxona faoliyati uchun 1,7 milliard so‘m imtiyozli kredit ajratilishiga erishib, ushbu noturar binoda go‘yoki qurilish va taʼmirlash ishlari amalga oshirilgani to‘g‘risida hujjatlarni rasmiylashtirib, kredit mablag‘larini boshqa maqsadlarga sarflab yuborgani aniqlangan.
Shu kabi, departamentning To‘rtko‘l tuman bo‘limi tomonidan o‘tkazilgan tergovga qadar tekshiruvda “K.n.” MCHJ masʼul shaxslari maxsus texnika va qurilish materiallarini sotib olish uchun tijorat banki To‘rtko‘l filialidan ajratilgan kredit mablag‘i evaziga go‘yoki ikki dona “Vovsat” rusumli ekskavator xarid qilgani to‘g‘risida soxta hujjatlarni rasmiylashtirib, fuqaro S.A.ning plastik kartasiga 1,5 milliard so‘m kredit mablag‘ini o‘tkazib olib naqdlashtirgani aniqlangan.
Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish), 192-11-moddasi (nodavlat tijorat tashkilotida yoki boshqa nodavlat tashkilotida mansabdor shaxslar tomonidan o‘z vakolatlarini suiisteʼmol qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Surxondaryoda xususiy bog‘cha qurish uchun ajratilgan 356 mln so‘m kredit mablag‘lari talon-toroj qilingani to‘g‘risida xabar berilgandi. Shuningdek, Toshkent viloyatida fermer xo‘jaligi 3,1 mlrd so‘m imtiyozli kredit mablag‘ini o‘zlashtirgani ma’lum bo‘lgan edi.
Izoh (0)