O‘zbekiston Madaniyat va san’atni rivojlantirish jamg‘armasi tashabbusi bilan 21 ta bino modernizm davri obyekti maqomini oldi va milliy madaniy meros obyektlari ro‘yxatiga kiritildi. Bu haqda jamg‘arma matbuot xizmati xabar berdi.
Qayd etilishicha, Vazirlar Mahkamasining 2024-yil 22-apreldagi “Moddiy madaniy meros obyektlarining milliy ro‘yxatiga o‘zgartirish va qo‘shimchalar kiritish to‘g‘risida”gi 227-son qarori qabul qilingan.
Birinchi bosqichda Davlat sanʼat muzeyi, “O‘zbekiston” va “Shodlik” mehmonxonalari, “Kosmonavtlar” metro bekati, Aviatsiya ishlab chiqaruvchilar saroyi kabi 11 ta yangi obyekt ro‘yxatga kiritildi, 10 ta obyektning maqomi o‘zgartirilgan.
Jamg‘arma yuqorida qayd etilgan modernistik uslubdagi binolarni UNESCO’ning Butunjahon merosi ro‘yxatiga kiritish uchun nomzodnoma tayyorlamoqda.
Mart oyi oxirlarida Vazirlar Mahkamasi qarori bilan Toshkent shahri va viloyatlardagi 160 ga yaqin mozaik panno monumental san’at yodgorliklari sifatida Moddiy madaniy merosning ko‘chmas mulk obyektlari milliy ro‘yxatiga kiritilgan edi. Shu qaror bilan mozaikali binolarga reklama bannerlarini o‘rnatish taqiqlangan.
Izoh (0)