Toshkent viloyati Chirchiq shahrida Qo‘riqlash bo‘limi xodimlari tomonidan 13 tonnadan ortiq rangli metallar talon-toroj qilinishining oldi olindi. Bu haqda Milliy gvardiya matbuot xizmati xabar berdi.
Qayd etilishicha, 19-aprel kuni Toshkent viloyati Qo‘riqlash boshqarmasi xodimlari tomonidan harakatlanayotgan vaqtida shubha uyg‘otgan MAN rusumli yuk avtomobili kuzatilgan. Yuk mashinasi Chirchiq shahridagi “O‘zmetkombinat” AJ korxonasi hududidagi qora metall qabul qilish shoxobchasiga kirib tarozidan o‘tayotganda to‘xtatilib, tekshirilgan.
Xolislar ishtirokida yuk avtomobilining tirkama qismi o‘rnatilgan tartibda ko‘zdan kechirilganda, davlat mulki bo‘lgan taxminiy og‘irligi 13 tonnadan ortiq kimyoviy aralashmalar uchun mo‘ljallangan rangli metallar borligi aniqlangan.
Dastlabki surishtiruvlar jarayonida yuk avtomobili haydovchisi Chirchiq shahrida yashovchi 57 yoshli F.E ekani, mazkur yukning hech qanday hujjatlari yo‘qligi maʼlum bo‘lgan.
Hozirda holat yuzasidan Qo‘riqlash boshqarmasi xodimlari tomonidan tergovga qadar surishtiruv ishlarini olib borish uchun Chirchiq shahar IIO FMBga hujjatlar taqdim qilingan.
Bundan oldin Samarqandda issiqxona qurish uchun ajratilgan 1,7 mlrd so‘m kredit mablag‘i talon-toroj qilingani, Qarshi tumani prokuraturasi tergovchisi pora olayotganda ushlangani, Toshkent viloyatida gaz zapravka sobiq hisobchisi salkam 1 mlrd so‘mni o‘zlashtirgani to‘g‘risida xabar berilgandi.
Izoh (0)