HeadHunter ish qidirishga ixtisoslashgan onlayn-platformasi ish beruvchilar vakansiyasi tahlilidan kelib chiqib O‘zbekistonda haydovchilarga bo‘lgan talab ortganini ma’lum qildi.
Qayd etilishicha, O‘zbekistondagi haydovchilar bozori taklif etilayotgan ish haqi va kasbga bo‘lgan talab darajasida hayratlanarli darajada o‘sishda davom etmoqda. So‘nggi ma’lumotlarga ko‘ra, mamlakatda 2023-yilda haydovchilarning ish haqi undan oldingi yilga nisbatan 35 foizga o‘sgan va 5,5 million so‘mdan ortiqni tashkil etgan. Ushbu o‘sish haydovchilarning O‘zbekiston iqtisodiyotidagi roli sezilarli darajada ortib borayotganidan dalolat beradi.
Ayniqsa, Toshkent, Samarqand, Buxoro va Namangan kabi yirik shaharlarda haydovchilarga talab yuqori. Taksi haydovchilar, shuningdek, yuk mashina va ekspeditor haydovchilar vakansiyasi maoshi 12 million so‘mdan 24 million so‘mgacha bo‘lgan “qimmat” takliflar orasida yetakchi pozitsiyani egallamoqda.
2024-yil aprel holatiga ko‘ra, mamlakatda haydovchilarga bo‘lgan talab o‘tgan yilga nisbatan 43 foizga oshgan, 2023-yilda umumiy vakinsiyalar soni qariyb 4 mingni tashkil etgan.
“Ta’kidlash kerakki, har uchinchi bo‘sh ish o‘rinlarida mehnat shartnomasini tuzish imkoniyati ko‘rsatilmoqda”, — deyiladi xabarda.
O‘zbekistonda 2024-yil 1-mart holatiga ko‘ra, o‘zini o‘zi band qilgan haydovchilar tomonidan jami ko‘rsatilgan xizmatlar soni 18,3 milliondan oshgani to‘g‘risida xabar berilgandi.
Izoh (0)