Andijonda Cobalt, Damas va “Moskvich” ishtirokidagi YTHda ikki haydovchi halok bo‘ldi (video)

Andijon viloyati IIB Yo‘l harakati xavfsizligi boshqarmasi Xo‘jaobod tumanida sodir bo‘lgan yo‘l-transport hodisasi yuzasidan ma’lumot berdi.

Qayd etilishicha, 4-aprel kuni soat 15:30 larda Xo‘jaobod tumani “Mustaqillikning 27-yilligi” MFY hududidan o‘tgan Guliston—Bo‘ka—Angren—Qo‘qon va Andijon orqali Osh avtomobil yo‘lida yo‘l-transport hodisasi sodir bo‘lgan. 22 yoshli Cobalt haydovchisi avtomashinani boshqarib ketayotib, quvib o‘tish qoidasini buzgan va yo‘lning qarama-qarshi tomoniga o‘tgan vaqtida, o‘z yo‘nalishida qarshisidan kelayotgan 33 yoshli A.B. boshqaruvidagi Damas bilan to‘qnashib ketgan.

Damas avtomashinasi to‘qnashuv natijasida boshqaruvni yo‘qotgan va o‘zi bilan bir yo‘nalishda yonma-yon kelayotgan 34 yoshli N.X. boshqaruvidagi “Moskvich-412” rusumli avtomashinasiga borib urilgan.

YTH oqibatida Cobalt avtomashinasi haydovchi A.G. “Bosh chanoq suyagining yopiq sinishi, ko‘krak qafasining ezilishi”, Damas avtomashinasi haydovchisi B.A. “Bosh chanoq suyagining hamda o‘ng yelka va o‘mrov suyaklarining yopiq sinishi”, Damas avtomashinasi ichida bo‘lgan 29 yoshli yo‘lovchi A.O. “Chap oyoq boldir suyagining yopiq sinishi” tashxisi bilan Respublika shoshilinch tez tibbiy yordam markaziga yotqizilgan. Ko‘rsatilgan muolajalarga qaramay Cobalt va Damas haydovchilari shifoxonada vafot etgan.

Holat yuzasidan, Xo‘jaobod tumani IIB Tergov bo‘linmasi xodimlari tomonidan tergovga qadar surishtiruv ishlari olib borilmoqda.

Kuni kecha Toshkentda yuk mashinasi va 14 ta avtomobil ishtirokida YTH sodir bo‘lgandi.