Surxondaryo viloyatining Sariosiyo tumanidagi “Nilu” mahallasida ayol boshqaruvidagi Nexia-3 tik nishablikda yo‘ldan chiqib ketib, YTH sodir bo‘ldi. Natijada ruldagi ayol va uning ikki nafar farzandi voqea joyida vafot etdi. Bu haqda Surxondaryo viloyati IIB Yo‘l harakati xavfsizligi boshqarmasi axborot xizmati xabar berdi.
Bildirilishicha, voqea 2024-yilning 27-mart kuni soat taxminan 15:40 larda sodir bo‘lgan.
Sariosiyo tumanining “Nilu” mahallasi hududidan o‘tuvchi 4R-107 avtomobil yo‘lining 21-kilometrida 1983-yilda tug‘ilgan, haydovchilik guvohnomasiga ega bo‘lmagan ayol Nexia-3 avtomobilini Sangardak—Denov yo‘nalishida boshqarib kelib, tezlikni me’yoridan oshirishi oqibatida tik nishablikda boshqaruvni yo‘qotgan. Yo‘ldan chiqib ketgan avtomobil beton to‘siqqa urilgan. Yo‘l-transport hodisasi ortidan avtomobilda yong‘in yuzaga kelgan, — deyiladi boshqarma axborot xizmati xabarida.
Ta’kidlanishicha, mazkur YTH hamda yong‘in natijasida avtomobil haydovchisi va uning ikki nafar voyaga yetmagan farzandi voqea joyida vafot etgan.
Shuningdek, avtomobilda bo‘lgan haydovchining yana bir nafar farzandi hamda yaqin qarindoshi (avtomobil egasi) og‘ir tan jarohati bilan shifoxonaga yotqizilgan, — deydi mas’ullar.
Boshqarma axborot xizmati fuqarolardan haydovchilik guvohnomasiga yoki yetarlicha malakaga ega bo‘lmay turib avtomobil boshqarmaslikni so‘ragan.
Izoh (0)