Tarmoqlarda Andijon viloyatining Shahrixon tibbiyot birlashmasiga qarashli UTT (Ultratovush tekshiruvi) xonasiga kamera o‘rnatilganligi aks etgan video tarqaldi.
“Faqat bir jihat qiziq. Nahotki, birlashmadagi yuzlab ziyolilar bemorlarning to‘liq bo‘lmasa-da, yechinib tekshiruvdan o‘tadigan joyga kamera o‘rnatish mumkin emasligini bilmagan bo‘lsa?”, — deyiladi xabarda.
Holat yuzasidan Shahrixon tuman tibbiyot birlashmasining ma’lum qilishicha, UTT xonasiga kamera o‘rnatilgan.
“Haqiqatdan ham birlashma tomonidan 2024-yilda muassasada xodimlarning ish faoliyatini qat’iy nazoratga olish, bemorlar va tibbiyot xodimlari o‘rtasidagi munosabatlarni tartibga solish, sodir bo‘lgan noxush va kriminal holatlarni o‘rganishga aniqlik kiritish maqsadida barcha xonalarga kameralar o‘rnatilishi rejalashtirildi.
Hozirda muassasada kameralarni o‘rnatish ishlari olib borilmoqda. Ijtimoiy tarmoqlarda UTT xonasiga o‘rnatilgan kamera ishchi holatida bo‘lmagan, texnik xodimlar tomonidan xizmat ko‘rsatish xonasi yo‘nalishini tushunmasligi oqibatida o‘rnatilgan”, — deyiladi birlashma izohida.
Qo‘shimcha qilinishicha, ushbu holat bartaraf etilgan va muassasada kameralar o‘rnatilishi lozim bo‘lgan joylarning barchasi qayta o‘rganib chiqilgan.
Andijon viloyati sog‘liqni saqlash boshqarmasi bunday holatga yo‘l qo‘ygan mas’ul rahbarlarga nisbatan qanday jazo qo‘llanilgani yuzasidan ma’lumot bermagan.
Izoh (0)