O‘zbekistonning oltin-valyuta zaxiralari ikki oylik pasayishdan keyin mart oyida ko‘tarildi. Bu haqda Markaziy bank ma’lumotlarida keltirilgan.
Qayd etilishicha, 1-mart holatiga ko‘ra, mamlakat oltin-valyuta zaxiralari hajmi 34,19 milliard dollarni tashkil etgan. O‘tgan oyda xalqaro aktivlar hajmi 1,99 milliard dollarga oshib, 2023-yilning dastlabki ikki oyidagi pasayishni deyarli qoplagan.
Xorijiy valyutadagi aktivlar miqdori 8,26 milliard dollarni tashkil etib, so‘nggi yillardagi eng past ko‘rsatkichlardan birida saqlanib qolgan. O‘tgan oyda ularning miqdori 710,7 million dollarga oshgan. Shuningdek, zaxiradagi oltinning fizik hajmi sezilarli darajada — bir oy oldingi 11,9 million troy unsiyadan (370 tonna) 11,5 million troy unsiyaga (357,69 tonna) kamaygan.
Statistika agentligi fevraldagi oltin sotuvi respublikaning yanvar—fevral oylaridagi jami eksportining 36,3 foizini tashkil etganini ma’lum qilgandi. Respublika 2023-yil yanvarda 1,2 milliard dollarlik oltin eksport qilgan. Joriy yil yanvarda esa oltin sotilmagan. O‘zbekiston Markaziy banki joriy yilning fevral oyida 12 tonna oltin sotib, bu davrda qimmat metall sotuvi bo‘yicha dunyoda birinchi o‘ringa chiqqan.
Oltin zaxiralari nima uchun kerak?
Oddiy til bilan aytganda, bu sug‘urta, davlatning “xavfsizlik yostig‘i”. Zaxiralar dunyoning deyarli barcha mamlakatlarida favqulodda vaziyatlar uchun mavjud.
Zaxiralar odatda yuqori likvidli, ya’ni tez sotiladigan aktivlarda saqlanadi. Oltin va xorijiy valyuta ushbu talablarga javob beradi — ulardan istalgan vaqtda qarz to‘lash yoki investitsiyalar uchun foydalanish mumkin.
Izoh (0)