Bugun, 17-sentyabr kuni Oliy Majlis Qonunchilik palatasida hayvonlarni identifikatsiya qilishga doir qonun loyihasi ko‘rib chiqilgan edi. Palata axborot xizmati tarqatgan xabarda iste’mol uchun ishlatiladigan go‘sht va boshqa mahsulotlar olinadigan hayvonlar qatoriga eshakni ham qo‘shib ketgan. Natijada tarmoqlarda eshak go‘shti ham iste’mol qilinadigan go‘shtlar qatoriga qo‘shildi mazmunida xabarlar tarqaldi.
Holat yuzasidan Veterinariya va chorvachilikni rivojlantirish davlat qo‘mitasi axborot xizmati “Daryo”ga izoh berdi.
“Qonun loyihasining biror joyida ‘eshak go‘shti iste’moli’ degan jumla yo‘q. Eshakni identifikatsiya qilishdan asosiy maqsad — eshakdan odamga va boshqa hayvonlarga yuqadigan kasalliklarni oldini olish”, deyiladi qo‘mita axborotida.
Ma’lumot uchun, eshak terisi va ichagi tibbiyotda sub tovar sifatida foydalaniladi. Qonunchilikda eshak go‘shtini iste’mol qilish yoki sotganlik uchun javobgarlik yo‘q. Faqat eshak go‘shtini boshqa hayvon, masalan, mol go‘shti deb sotganlik uchun javobgarlik mavjud.
Izoh (0)