Toshkent viloyatida adolatsiz qaror chiqargan sudya 4 yilga ozodlikdan mahrum qilindi

Toshkent viloyatidagi Nurafshon tumanlararo ma’muriy sudi sudyasi A.A. adolatsiz qaror chiqargani uchun sudlanib, ozodlikdan mahrum etildi.

Sud hujjatida keltirilishicha, 50 yoshli A.A. Nurafshon tumanlararo ma’muriy sudining sudyasi lavozimida ishlab, ommaviy-huquqiy nizolar bilan bog‘liq ishlarni ko‘rish vaqtida o‘z mansab vakolatlarini suiiste’mol qilgan. U 2021—2022-yillarda 27 ta holatda Yer kodeksi, prezident va hukumatning tegishli farmon va qarorlari talablariga zid ravishda hokimlik hamda kadastr idoralarining yer (bino-inshootlar) bilan bog‘liq qarorlarini haqiqiy emas deb topib, ular zimmasiga majburiyatlar yuklash haqida adolatsiz hal qiluv qarorlari qabul qilgan.

A.A. tomonidan qabul qilingan ushbu 27 ta hal qiluv qarorining barchasi Toshkent viloyat ma’muriy sudi apellyatsiya instansiyasi qarorlari bilan bekor qilingan.

Jinoyat ishlari bo‘yicha Olmazor tuman sudining 2024-yil 4-iyuldagi hukmi bilan A.A. Jinoyat kodeksining 231-moddasi 1-qismi (oldindan bila turib, adolatsiz hukm, hal qiluv qarori, ajrim yoki qaror chiqarish) bilan aybli deb topilgan. Unga 2 yil sud idoralarida ishlash huquqidan mahrum qilingan holda 4 yil muddatga ozodlikdan mahrum qilish jazosi tayinlangan. Jazoni manzil koloniyalarida o‘tash belgilangan.

Sudyalar oliy kengashi axborot xizmati rahbari Tursunali Akbarovning “Daryo”ga ma’lum qilishicha, ushbu sudya (unga nisbatan jinoyat ishi qo‘zg‘atilishidan avval) Sudyalar oliy kengashi qarori bilan odil sudlovni amalga oshirish chog‘ida qonuniylikni buzgani uchun lavozimidan ozod etilib, vakolatlari muddatidan avval tugatilgan.