Joriy yilgi saylovlarda O‘zbekiston ekologik partiyasi ilgari surayotgan muhim tashabbuslardan biri bu 2030-yilga qadar pestitsidlardan foydalanish hajmini 50 % kamaytirishdan iborat.
Mazkur taklif aholimizning sog‘lom turmush tarzini yanada yaxshilash, oziq-ovqat mahsulotlarining sifatini oshirishda tabiiy qishloq xo‘jaligi mahsulotlarini yetishtirish uchun muhim sanaladi.
Pestitsidlar zararkunandalarni yo‘q qilish uchun ishlatiladigan kimyoviy modda bo‘lib, afsuski hozirgi kunda ekinlarni zararkunandalardan himoya qilishda ulardan faol ravishda foydalanib kelinadi. Bular butun dunyoda qo‘llaniladigan ekinlarni himoya qilishning asosiy shaklidir. Pestitsidlar zararkunandalarga qarshi kurashish va yaxshi hosil olishda muhim ahamiyatga ega bo‘lsa-da, ularning salbiy oqibatlarini e’tibordan chetda qoldirib bo‘lmaydi.
Ayniqsa, pestitsidlardan foydalanishda oxirgi ishlov bilan hosilni terib olish orasidagi muddat juda muhimdir. Bu bilan biror bir meva yoki boshqa mahsulotning tarkibida qoladigan pestitsid miqdori boshqariladi. Ba’zi pestitsidlarni hosil terib olishdan 1 oy oldin ishlatishga ruxsat bo‘lsa, ba’zilarini esa 10 kun oldin ishlatish mumkin. Masalan, yetishtirilayotgan pomidorni terib olishdan kamida 1 oy oldin ishlatishdan to‘xtatish kerak bo‘lgan pestitsidni bugun ishlatib keyin 5 yoki 10 kundan keyin bu pomidor terib bozorga olib chiqilsa inson salomatligiga salbiy ta’sir ko‘rsatishi tayin. Yoki gektariga 1 kilogramm ishlatish kerak bo‘lgan pestitsidni yaxshiroq natija olaman deb, ko‘r-ko‘rona 2 kilogrammdan ishlatish ham qonunga xilofdir. Chunki bunday holatlarda yetishtirilayotgan mahsulot tarkibida inson salomatligi uchun jiddiy xavf tug‘dirishi mumkin bo‘lgan pestitsid qoldiqlari qolib ketgan bo‘ladi.
Pestitsidlar odamlar va atrof-muhitni xavf ostida qoldirishi, saraton va nevrologik kasalliklarni keltirib chiqarishi, suv manbalari hamda oziq-ovqat mahsulotlarini ifloslanishiga olib kelishi mumkin.
Shu jihatdan O‘zbekiston ekologik partiyasi aholi salomatligini himoyalash va sog‘lom hayot kechirishini ta’minlash, tuproq unumdorligini yanada yaxshilash maqsadida qishloq xo‘jaligi mahsulotlari yetishtirishda kimyoviy kurash bilan birgalikda biologik kurash usullaridan keng foydalanish zarur ekanligi va bu bilan pestitsidlarning zararli moddalari tuproqlarga, suv manbalari va atmosferaga o‘tib ketishini oldini olish tarafdoridir.
Izoh (0)