Наманган вилоят суди раиси Алишер Усманов “Бенуқсон хизматлари учун” кўкрак нишони билан тақдирланди. Поп тумани ҳокимининг ўғлига нисбатан жазони ўзгартириб, уни озодликка чиқарган суд мажлисида маърузачи бўлган вилоят судининг судьяси Авазбек Иномовнинг ота-онасига эса Судьялар олий кенгаши ташаккурномаси эълон қилинди. Бу ҳақда Наманган вилояти судлари расмий саҳифасида эълон қилинди.
Аввалроқ Daryo.uz сайтида катта миқдорда электр энергияси ўғирлаган Поп тумани ҳокимининг ўғли қамоқдан озод қилингани ҳақида ёзган эди. Шундан сўнг Kun.uz сайтида ушбу жиноят иши худди шундай жиноятга қўл урган бошқа тадбиркор қамоқда қолгани, ҳокимнинг ўғли эса жазодан деярли қутилиб қолгани ҳақида мақола эълон қилинган эди.
Ниҳоят, Наманган вилоят суди расмий муносабат билдирди. Унда ҳокимнинг ўғлига озодликдан маҳрум қилиш бўлмаган жазо тайинлашда унинг айбига иқрорлиги, жиноят оқибатида етказилган зарар қопланганидан ташқари Олий Мажлис Сенати аъзоси ҳамда Уйчи тумани фермер, деҳқон хўжаликлари ва томорқа ер эгалари кенгаши ҳамда маҳалла раисининг судга киритилган илтимосномалари эътиборга олингани айтилади.
Худди шундай жиноятда айбланган бошқа бир тадбиркор томонидан етказилган зарар қопланган бўлса-да, бироқ миқдори беш баробар кўплиги ва айбига иқрор бўлмагани унга нисбатан озодликдан маҳрум қилиш билан боғлиқ жазо тайинланишига асос сифатида кўрсатилади. Шунингдек, вилоят суди муносабатида суд ажримига нисбатан шикоят келтириш мумкинлиги ва белгиланган тартибда кўриб чиқилиши, суд ҳужжатларига фақат юқори суд инстанцияси ҳуқуқий баҳо бериш ваколатига эга экани ҳам билдирилган.
Наманган вилоят судининг ушбу муносабати ижтимоий тармоқда навбатдаги муҳокамаларга олиб келди. Муҳокамаларнинг аксариятида “оғзи қийшиқ бўлса ҳам бойвачча гапирсин!” мазмунида истеҳзо қилинаётган бўлса, айрим фойдаланувчилар “ҳар икки ҳолатда ҳам зарар қопланганига” эътибор қаратиб, “айбига иқрор эмаслиги оғирлаштирувчи ҳолат деб баҳоланишига” жиддий эътироз билдиради. Яна бир муносабатда ҳокимнинг ўғлига Олий Мажлис Сенати аъзоси ҳамда Уйчи тумани фермер, деҳқон хўжаликлари ва томорқа ер эгалари кенгаши илтимоснома киритгани, бундай илтимоснома нима учун қамоқда ўтирган шахсга нисбатан берилмагани, у ҳам тадбиркор эканини қайд этади.
Собиқ депутат ва жамоат фаоли Расул Кушербаев мазкур жиноят ишлари бўйича чиқарилган суд ажримларига билдирган муносабатда “Наманган суди раиси ва судьялари истеъфога чиқиши ва фаолияти текширилиши керак”лигини айтганди.
Судьялар олий кенгаши матбуот котиби Турсунали Акбаров эса “Дарё”нинг ушбу масала юзасидан сўровига: “Судьялар олий кенгаши суд ҳужжатларига ҳуқуқий баҳо бериш ваколатига эга эмас. Суд ҳужжатларига фақат юқори суд инстанцияси ҳуқуқий баҳо бериши мумкин”, дея жавоб берган эди.
Изоҳ (0)