Ijtimoiy tarmoqlarda bolalariga zaharli ilonlar bilan tomosha ko‘rsatilgani aks etgan video tarqalgandi. Toshkent viloyati maktabgacha va maktab taʼlimi boshqarmasi matbuot xizmati holat Piskent tumanidagi bog‘chada sodir bo‘lganini ma’lum qildi.
“Birinchidan bu tur ilonlar juda tez harakatlanuvchan va zaharli bo‘lishadi. Ikkinchidan ta’lim muassasalarida bunday zaharli ilonlar bilan tomoshalar o‘tkazishga qaysi rahbar rozilik bergani qiziq. Sirk tomoshalari qo‘yib yurgan shaxslarning ilonlarni saqlashga ruxsati bormi? Videoni diqqat bilan kuzatsangiz ilonlar bilan o‘ynayotgan shaxsning o‘zi ham ilonlarda qanchalik qo‘rqishini sezishingiz mumkin”, deb yozgandi ekolog Nargiz Qosimova
“Jonivorlarni yashikka solib ustini mato bilan berkitgan odam jonivorlar o‘lib qolishi haqida o‘ylamasa kerak”, deya qo‘shimcha qilgandi u.
Toshkent viloyati maktabgacha va maktab taʼlimi boshqarmasi bergan ma’lumotga ko‘ra, bu tomosha 16-yanvar kuni Toshkent viloyati Piskent tumanidagi 7-sonli davlat maktabgacha ta’lim muassasasida o‘tkazilgan. Bunda bog‘cha ma’muriyati tomonidan bolalarning hayoti va sog‘lig‘i uchun xavfsizlik choralari ta’minlanmagan.
Qayd etilishicha, ushbu tomosha Olmaliq shahar “Kumush diyor” xususiy korxonasi tasarrufidagi “Toshkent” havaskorlik sirk jamoasi xodimi H.A tomonidan uyushtirilgan bo‘lib, u o‘quv yili avvalida tuman maktabgacha va maktab ta’limi bo‘limiga ta’lim tizimidagi muassasalarga sirk tomoshalarini namoyish qilish bo‘yicha xat va dastur bilan murojaat qilgan. Mas’ullar tomonidan ushbu tomoshalarga ruxsat berilgan. Namoyishlar dasturida hayvonlar bilan sahna ko‘rinishlari ko‘rsatilmagan.
Toshkent viloyati maktabgacha va maktab ta’limi boshqarmasi tomonidan ishchi guruh tuzilib, o‘rganish ishlari olib borildi. Ishchi guruh xulosasi bilan holatga bevosita mas’ul bo‘lgan, e’tiborsizlik qilgan shaxslarga nisbatan chora ko‘rildi.
Shu bilan birga, Ichki ishlar organlari tomonidan ham mazkur holat to‘liq nazoratga olindi.
2024-yilning dekabrida Samarqanddagi bog‘cha va maktablarda bolalar xavfsizligiga zid ravishda ilon tomoshalari o‘tkazilgani aniqlangandi. Tomoshalarda foydalanilgan mazkur yo‘lbars pitoni Xalqaro Qizil kitobga kiritilgan. Uzunligi 2,78 metr eni 28 santimetr bo‘lgan ushbu jonzot O‘zbekistonga noqonuniy yo‘l bilan olib kirilgan.
Izoh (0)