Britaniya Qirollik zarbxonasi yozuvchi Jorj Oruell vafotining 75 yilligiga bag‘ishlangan ikki funt sterling qiymatidagi tangani muomalaga chiqardi. Bu haqda BBC xabar berdi.
Tanganing orqa tomonida ko‘z tasviri bo‘lib, uning atrofida Oruellning “1984” asaridan olingan eng mashhur “Katta og‘a seni kuzatmoqda” iqtibosi joylashtirilgan.
Tanganing qirrasiga ushbu romandan yana bir mashhur iqtibos o‘yib yozilgan: “Haqiqat bor va yolg‘on bor”. Dizayn muallifi Genri Greyga ko‘ra, u ishida nafaqat Oruell asaridan, balki zamonaviy texnologiyalardan ham ilhom olgan. Chunki ularning ayrimlari yozuvchining prognozlarini haqiqatga aylantirgan.
Bu senga ko‘zini pirpiratmay tikilib turgan kamera obyektiviga o‘xshaydi. Hozir uylarimizning har burchagida telefon va kameralar bor, reklama beruvchilar telefon orqali suhbatlarimizni tinglaydi, shuning uchun bizni doimiy ravishda kuzatib turishayotganini sezmay ilojimiz yo‘q.
Aynan shu haqda “1984” romani yozilgandi. Asar hamma narsa nazorat ostida bo‘lgan va odamlarga mavjud tartib-qoidalarga bo‘ysunishlari uchun doimiy bosim o‘tkaziladigan sharoitdagi hayot haqida so‘zlaydi, deydi Grey.
Tangalarni 15-yanvardan boshlab Qirollik zarbxonasining rasmiy veb-saytida xarid qilish mumkin. Jorj Oruell (asl ismi Erik Artur Bler) 1950-yil 21-yanvarda 46 yoshida vafot etgan.
1949-yilda nashr etilgan “1984” romani Oruellning eng mashhur asari bo‘ldi. Unda bir vaqtning o‘zida ham Sovet ittifoqini, ham natsistlar Germaniyasini eslatuvchi totalitar jamiyat tasvirlangan. SSSRda bu roman taqiqlangandi, hozirda Belarusda ham unga taqiq qo‘yilgan.
Izoh (0)