Ijtimoiy tarmoqlarda Toshkentda taksi haydovchisi mijozga suv ichirib uxlatib qo‘yib, uning nomiga 12 mln so‘m mikrokredit rasmiylashtirib olgani aytilgan xabarlar tarqaldi. Poytaxt IIBB matbuot xizmati holatga oydinlik kiritdi.
Ma’lum bo‘lishicha, taksiga chiqqan ayol shu kuni avvaldan spirtli ichimlik ta’sirida mast holda bo‘lgan. Ayol telefonini haydovchiga manzil geolokatsiyasini ko‘rish uchun o‘z ixtiyori bilan berib qo‘ygan va uxlab qolgan. Ijtimoiy tarmoqlarda aytilayotganidek taksichi mijozni narkotik modda qo‘shilgan suv berib hushidan ayirmagan.
Avtomashina haydovchisi va uning sherigi uxlab qolgan mizojning telefonidagi ilova orqali uning nomiga onlayn banklarning biridan 12 million so‘m mikroqarz rasmiylashtirgan. Pulni o‘z kartasiga o‘tkazib, bankomatdan yechib olgan.
Toshkent shahar IIBB Axborot texnologiyalari sohasidagi jinoyatlarga qarshi kurashish boshqarmasi xodimlari tomonidan olib borilgan tezkor tadbirlar natijasida har ikkala shaxs ushlangan.
Holat yuzasidan Jinoyat kodeksining 169-moddasi (o‘g‘rilik) bilan jinoyat ishi qo‘zg‘atildi. Ayni paytda jabrlanuvchiga yetkazilgan moddiy zarar qoplab berilgan. Tergov harakatlari davom ettirilmmoqda.
Izoh (0)