Ижтимоий тармоқларда Тошкентда такси ҳайдовчиси мижозга сув ичириб ухлатиб қўйиб, унинг номига 12 млн сўм микрокредит расмийлаштириб олгани айтилган хабарлар тарқалди. Пойтахт ИИББ матбуот хизмати ҳолатга ойдинлик киритди.
Маълум бўлишича, таксига чиққан аёл шу куни аввалдан спиртли ичимлик таъсирида маст ҳолда бўлган. Аёл телефонини ҳайдовчига манзил геолокациясини кўриш учун ўз ихтиёри билан бериб қўйган ва ухлаб қолган. Ижтимоий тармоқларда айтилаётганидек таксичи мижозни наркотик модда қўшилган сув бериб ҳушидан айирмаган.
Автомашина ҳайдовчиси ва унинг шериги ухлаб қолган мизожнинг телефонидаги илова орқали унинг номига онлайн банкларнинг биридан 12 миллион сўм микроқарз расмийлаштирган. Пулни ўз картасига ўтказиб, банкоматдан ечиб олган.
Тошкент шаҳар ИИББ Ахборот технологиялари соҳасидаги жиноятларга қарши курашиш бошқармаси ходимлари томонидан олиб борилган тезкор тадбирлар натижасида ҳар иккала шахс ушланган.
Ҳолат юзасидан Жиноят кодексининг 169-моддаси (ўғрилик) билан жиноят иши қўзғатилди. Айни пайтда жабрланувчига етказилган моддий зарар қоплаб берилган. Тергов ҳаракатлари давом эттирилммоқда.
Изоҳ (0)