9-may kuniga o‘tar kechasi Pokiston harbiylari Hindistonning shimoliy va g‘arbiy hududlaridagi 36 ta obyektga muvofiqlashtirilgan hujum doirasida 300-400 ta dron uchirgan. Bu haqda Hindustan Times gazetasi ma’lum qildi.
“Qurolli kuchlarimiz zenit qurollari va boshqa vositalar yordamida ko‘plab dronlarni yo‘q qildi”, deydi Hindiston Qurolli kuchlari vakili Viomika Singx.
Singxning so‘zlariga ko‘ra, bunga javoban hind harbiylari Pokistondagi to‘rtta havo mudofaasi pozitsiyasiga uchuvchisiz uchish apparatlarini yo‘llagan va ulardan biri dushman radarini yo‘q qilishga erishgan.
Hindustan Times manbalarining ta’kidlashicha, 9-mayga o‘tar kechasi Pokistonning dronlar va raketalardan foydalangan havo hujumini qaytarishda Hindiston S-400 zenit-raketa komplekslari, Barak-8 va Akash zenit-raketalarini, shuningdek, Mudofaa tadqiqotlari va ishlanmalari tashkilotining dronga qarshi kurash texnologiyalarini qo‘llagan.
Ta’kidlanishicha, so‘nggi ikki kun ichida Dehlidagi Indira Gandi nomidagi Xalqaro aeroporti 228 ta reysni bekor qilgan. Rasmiylar mamlakatning 27 ta aeroportida fuqaro samolyotlarini qabul qilishni 10-maygacha to‘xtatgan.
Chipta talabining oshishi munosabati bilan Indian Railways kompaniyasi Jammu va Udxampur shaharlaridan Nyu Dehliga qo‘shimcha poyezdlarni yo‘lga qo‘ygan.
Hindiston bosh vaziri Narendra Modi juma kuni Pokiston bilan chegaradosh Gujarat shtati bosh vaziri Bhupendra Patel bilan bog‘lanib, ko‘rilayotgan xavfsizlik choralarini muhokama qildi. Patelning aytishicha, bosh vazir shtatning favqulodda vaziyatga va aholini himoya qilishga tayyorgarlik darajasini so‘ragan.
Hindiston va Pokiston o‘rtasidagi munosabatlar 22-aprel kuni Hindiston shimolida bir guruh jangarilar sayyohlar ko‘p to‘planadigan joyda odamlarga o‘t ochganidan so‘ng keskinlashdi. Voqeada 26 kishi halok bo‘ldi. Hindiston terakt uchun javobgarlikni Pokiston tomoniga yukladi.
7-mayga o‘tar kechasi Hindiston harbiylari Pokiston hududidagi infratuzilma va Kashmirning Islomobod nazoratidagi hududlariga aviazarbalar berdi. Pokiston bunga javob zarbalari bilan chiqdi.
Izoh (0)