CNN telekanalinining o‘z manbalariga tayanib xabar berishicha, Pokiston va Hindiston zamonaviy aviatsiya tarixidagi eng yirik va eng uzoq davom etgan havo jangni o‘tkazgan. Ma’lum bo‘lishicha, 125 ta jangovar samolyot taxminan bir soatdan ortiq o‘zaro kurash olib borgan. Shunga qaramay, hech bir tomon o‘z havo hududini tark etmagan, ba’zi raketa zarbalari esa 160 kilometrdan ortiq masofadan amalga oshirilgan, deb yozadi manba.
Pokiston xavfsizlik xizmatining CNN bilan suhbatlashgan yuqori martabali vakili 2019-yildan so‘ng tomonlar bir-birining havo hududiga nisbatan ehtiyotkorlik bilan yondasha boshlaganini bildirgan. O‘shanda pokistonlik uchuvchi hindlarning MiG-21 qiruvchisini urib tushirgandi.
“Shundan beri hech kim yana tahqirlanishni xohlamaydi”, deydi CNN manbasi.
Ayni shu bois bu safargi jangda ham tomonlar o‘z havo hududidan chiqmay harakat qilib, uzoq masofadan “havo-havo“ raketalari uchirish bilan cheklangan.
“Tutdek to‘kilgan” hind samolyotlari
7-mayga o‘tar kechasi Hindiston “Sindur operatsiyasi” nomli amaliyot o‘tkazib, Kashmirning Islomobod nazoratidagi hududlariga zarba berdi. Natijada mamlakatning o‘nlab fuqarolari halok bo‘ldi.
Biroq Pokiston havo mudofaa tizimlari hujumda qatnashgan hind samolyotlarining bir qanchasini tutib oldi. Islomobod ular orasida uchta Rafale, bitta Su-30 hamda yana bir MiG-29 qiruvchisi borligini ma’lum qildi. Keyinroq tarmoqlarda urib tushirilgan samolyotlarga tegishli qismlar tasvirlari tarqaldi. OSINT tahlilchilari ularni o‘rganib, pokistonliklarning da’volarini qisman tasdiqladi.
Ma’lum bo‘lishicha, Pokiston havo janglarida Xitoydan sotib olingan J-10 qiruvchilari hamda PL-15E “havo-havo” raketalarini qo‘llagan. Bu xabar ortidan Chengdu Aircraft Corporation aksiyalari keskin ko‘tarildi. Boisi yuqorida qayd etilgan samolyot aynan ushbu kompaniya tomonidan ishlab chiqariladi.
Xitoy kompaniyasining aksiyalari narxi oshgan bo‘lsa, Dassaul Rafale bilan buning aksi yuz berdi. Boisi u hind harbiylari “Sindur operatsiyasi“da qo‘llagan Rafale qiruvchi samolyotlarining ishlab chiqaruvchisi hisoblanadi. Pokiston kuchlari tomonidan urib tushirilgani aytilgan uchta samolyotdan biri vizual dalillar bilan tasdiqlandi.
2016-yili Hindiston Fransiya bilan 36 ta Rafale qiruvchisini sotib olish uchun 8,8 mlrd dollarlik shartnoma imzoladi. Bu hindlar har bir havo borti uchun o‘rtacha 244 mln dollardan to‘lashini anglatadi. Joriy yilda Dehli harbiy dengiz kuchlari uchun 26 ta Rafale M modifikatsiyalarini sotib olish bo‘yicha kelishuvga erishdi. Bu safar ularning har biri 285 mln dollardan tushdi.
Fransuz samolyotlarining bu qadar qimmatligini shartnoma nafaqat qiruvchilar, balki o‘q-dori va ehtiyot qismlari, texnik xizmat kabilarni ham ko‘zda tutishi bilan izohlash mumkin.
Izoh (0)