Qatar AQSH prezidenti Donald Trampga 400 million dollarlik “uchar saroy” deb nomlanuvchi Boeing 747-8 samolyotini sovg‘a qilishga tayyorlanmoqda. Bu haqda ABC News xabar berdi.
Ma’lum qilinishicha, samolyot Trampning prezidentlik muddati tugaguniga qadar Birinchi raqamli bort sifatida ishlatiladi. Prezidentlik muddatidan keyin samolyot davlat tasarrufidan chiqib, Trampning shaxsiy kolleksiyasiga o‘tadi. Bu AQSH prezidenti uchun tarixdagi eng qimmatbaho sovg‘a bo‘lishi mumkin.
Sovg‘a haqida Tramp kelasi hafta Qatarga borganida e’lon qilinishi kutilmoqda. AQSH prezidenti fevral oyida hashamatli bezaklari tufayli “uchar saroy” deb nom olgan samolyotni Vest-Palm-Bich aeroportida turganida ko‘zdan kechirgan edi.
Sovg‘aning qonuniylik masalasi
Nashrning yozishicha, Qatarning sovg‘asi qonuniyligi borasida savollar tug‘diradi. Oq uy va Adliya vazirligi yuristlari bu borada mudofaa vaziri Pit Xegset uchun huquqiy tahlil tayyorlagan. Ular Mudofaa vazirligi sovg‘ani qabul qilishi va keyinroq uni Tramp fondiga topshirish huquqiga ega degan xulosaga kelgan.
Manbalar sovg‘a prezidentning hech qanday harakati bilan bog‘liq bo‘lmagani uchun pora hisoblanmasligini ta’kidlagan. Samolyot jismoniy shaxsga emas, balki davlat muassasasiga topshirilgani sababli, bu AQSH Konstitutsiyasini buzmaydi.
Hashamatli samolyot haqida nimalar ma’lum?
Ekspertlarning hisob-kitoblariga ko‘ra, samolyotning narxi aloqani himoya qilish uchun qo‘shimcha uskunalarni hisobga olmaganda taxminan 400 million dollarni tashkil etadi.
U dastlab AQSH harbiy-havo kuchlariga topshiriladi, ular 13 yillik aviatexnikani prezident uchun xavfsizlik talablariga muvofiq qayta jihozlaydi. L3Harris kompaniyasi allaqachon samolyotni modernizatsiya qilish bo‘yicha shartnoma olgan.
Hozirgi birinchi raqamli bortlar 1990-yildan beri ishlatilgan eski Boeing 747-200 samolyotlaridir. 2018-yilda buyurtma qilingan yangi samolyotlarni yetkazib berish kechikmoqda. Ular faqat 2029-yilda, Tramp prezident bo‘lmaganida tayyor bo‘lishi kutilmoqda. Ammo Tramp bu yil yangi samolyot sotib olishni talab qilmoqda.
Izoh (0)