62 yoshli Tom Kruz yana bir bor jahon miqyosidagi kinoyulduz maqomini tasdiqladi. Kann festivalida u “Uddalab bo‘lmas topshiriq: yakuniy jazo” filmi uchun yetti daqiqalik olqishlarga sazovor bo‘ldi.
The Hollywood Reporter xabariga ko‘ra, Kruzga qizil gilamda rejissyor Kristofer MakKuorri, shuningdek, hamkasblari Xeyli Etvell, Saymon Pegg, Hanna Uoddingem, Anjela Bassett, Esay Morales, Pom Klementyeff va Greg Tarzan Devis hamrohlik qilishdi.
Qarsaklarga javoban aktyor franshizaning so‘nggi to‘rt qismini yaratgan rejissyor Kristofer MakKuorriga hamda uni doimo sevib va qo‘llab-quvvatlab turgan muxlislariga minnatdorlik bildirdi.
“Uddalab bo‘lmas topshiriq”ning birinchi filmi 1996-yilda ekranlarga chiqqan edi. Hozirgacha sakkiz qismi suratga olingan bo‘lib, ularning barchasida bosh rolni Tom Kruz o‘ynagan. Aytish joizki, u hali ham murakkab va xavfli tryuklarni o‘zi bajarishda davom etmoqda.
Mashhur franshiza davom etadimi yoki yo‘qmi — hozircha sir. Biroq sakkizinchi film yakuniy deb atalmagan va Kruz MakKuorrining kelajakdagi ishlarida ishtirok etish istagini oshkor qilgan.
Izoh (0)