62 ёшли Том Круз яна бир бор жаҳон миқёсидаги киноюлдуз мақомини тасдиқлади. Канн фестивалида у “Уддалаб бўлмас топшириқ: якуний жазо” фильми учун етти дақиқалик олқишларга сазовор бўлди.
The Hollywood Reporter хабарига кўра, Крузга қизил гиламда режиссёр Кристофер МакКуорри, шунингдек, ҳамкасблари Хейли Этвелл, Саймон Пегг, Ҳанна Уоддингем, Анжела Бассетт, Эсай Моралес, Пом Клементефф ва Грег Тарзан Дэвис ҳамроҳлик қилишди.
Қарсакларга жавобан актёр франшизанинг сўнгги тўрт қисмини яратган режиссёр Кристофер МакКуоррига ҳамда уни доимо севиб ва қўллаб-қувватлаб турган мухлисларига миннатдорлик билдирди.
“Уддалаб бўлмас топшириқ”нинг биринчи фильми 1996 йилда экранларга чиққан эди. Ҳозиргача саккиз қисми суратга олинган бўлиб, уларнинг барчасида бош ролни Том Круз ўйнаган. Айтиш жоизки, у ҳали ҳам мураккаб ва хавфли трюкларни ўзи бажаришда давом этмоқда.
Машҳур франшиза давом этадими ёки йўқми — ҳозирча сир. Бироқ саккизинчи фильм якуний деб аталмаган ва Круз МакКуоррининг келажакдаги ишларида иштирок этиш истагини ошкор қилган.
Изоҳ (0)